Milioneret nuk e zgjedhin më Zvicrën por Italinë ?

Zvicra vazhdon të jetë një destinacion tërheqës për njerëzit e pasur nga e gjithë bota, por të dhënat e fundit tregojnë një ndryshim të trendit. Gjatë vitit 2026 pritet që rreth 1,800 milionerë të zhvendosen në Zvicër, krahasuar me 3,000 një vit më parë.

Sipas një përllogaritjeje të kompanisë New World Wealth, kjo përfaqëson një rënie prej 40% të migrimit neto të milionerëve brenda vetëm një viti. Andrew Amoils, drejtues i kërkimeve në kompani, vlerëson se Zvicra nuk është më aq tërheqëse nga aspekti tatimor sa ka qenë më parë.

Një nga konkurrentët kryesorë po bëhet Italia. Gjithnjë e më shumë persona të pasur, veçanërisht nga Britania e Madhe dhe Franca, po e preferojnë Italinë në vend të Zvicrës. Arsye e rëndësishme është sistemi italian i tatimit paushall për të ardhurat e realizuara jashtë vendit, shkruan Watson, transmeton albinfo.ch.

Edhe Zvicra ofron forma të tatimit paushall në disa kantone, por ekspertët konsiderojnë se Italia aktualisht ka modele më konkurruese për individët me pasuri të mëdha. Në vitin 2025, Italia ishte ndër destinacionet më të preferuara nga milionerët, së bashku me Shtetet e Bashkuara dhe Emiratet e Bashkuara Arabe, ndërsa Zvicra renditej e katërta.

Megjithatë, interesimi për Zvicrën mbetet i konsiderueshëm. Zugu, Schwyz, Lucerna, Nidwalden dhe Obwalden vazhdojnë të jenë ndër kantonet më të preferuara nga personat e pasur për shkak të kushteve të favorshme tatimore.

Përveç konkurrencës tatimore, në diskutim ka hyrë edhe çështja e sigurisë. Një seri grabitjesh në vila në rajonin e Liqenit të Gjenevës ka ngritur shqetësime mes banorëve të pasur dhe kompanive. Megjithatë, stabiliteti politik, siguria dhe sistemi fiskal vazhdojnë të jenë ndër avantazhet kryesore që Zvicra u ofron individëve me pasuri të mëdha.

/albinfo