Mickoski paralajmëron rikonstruimin e Qeverisë në gjysmën e dytë të qershorit

Kryeministri Hristijan Mickoski ka bërë të ditur se rikonstruimi i Qeverisë pritet të diskutohet në pjesën e dytë të muajit qershor, kur do të zhvillohen takime me partnerët e koalicionit qeverisës për hapat e mëtejmë politikë.

Duke iu përgjigjur pyetjeve të gazetarëve lidhur me paralajmërimet për ndryshime në përbërjen e ekzekutivit, Mickoski tha se aktualisht është i fokusuar në proceset e brendshme partiake në VMRO-DPMNE, ndërsa bisedimet për rikonstruimin do të zhvillohen më vonë gjatë muajit.

“Në pjesën e dytë të qershorit ulemi me partnerët e koalicionit që të bisedojmë sesi tutje, kështu që mendoj se do ta kemi formatin në pjesën e dytë të qershorit”, deklaroi Mickoski.

Kryeministri komentoi edhe situatën në koalicionin qeverisës pas largimit të deputetit Mile Cekov nga ZNAM dhe nga shumica parlamentare, duke theksuar se nuk sheh arsye që kjo parti të përjashtohet nga qeveria.

“Ashtu nëse shohim, ka edhe parti të tjera në koalicion që kanë më pak ose më shumë deputetë. Është materie e gjallë, ai proces është dinamik”, tha ai.
Mickoski u ndal edhe te dorëheqja e zëvendëskryeministrit Arben Fetai, duke hedhur poshtë pretendimet se ai nuk ishte paraqitur në punë për muaj të tërë.

I pyetur nga gazetarët nëse Fetai kishte munguar për një periudhë të gjatë nga detyrat e tij, kryeministri reagoi duke kërkuar sqarime për burimin e informacionit.

“A nga e dini ju se me muaj nuk vinte në punë? Ju e udhëhiqni kartonin e tij?”, tha Mickoski, duke shtuar se nuk mban mend të ketë deklaruar ndonjëherë se Fetai nuk paraqitej në punë.
Ai rikujtoi se një deklaratë e tillë ishte bërë më herët nga ministri i Administratës Publike, Azir Aliu.

“Nga VLEN kishte, ja ministri Azir Aliu nga VLEN tha para ca kohësh. Atëherë atij parashtrojani pyetjen. Ndryshe, nuk është i saktë ai informacion”, deklaroi Mickoski.

Deklaratat e kryeministrit vijnë në një periudhë kur po shtohen spekulimet për ndryshime në përbërjen e Qeverisë dhe për ripozicionime të mundshme brenda koalicionit qeverisës. përcjell Zhurnal.mk .

/zhurnal