Mbyllja e gojës me ngjitës, trend i rrezikshëm apo zgjidhje për gjumë më të mirë?

Ndonëse i përhapur në rrjetet sociale si një metodë për përmirësimin e gjumit, mbyllja e gojës me ngjitës mund të jetë më shumë e rrezikshme sesa e dobishme
Në vitet e fundit, në rrjetet sociale është përhapur një trend i pazakontë: mbyllja e gojës me ngjitës gjatë gjumit.

Mbështetësit e kësaj metode pretendojnë se ajo ndihmon në përmirësimin e cilësisë së gjumit dhe të shëndetit të përgjithshëm, raportoi The Conversation. Ndër përfitimet e përmendura shpesh janë: më pak gërhitje, frymëmarrje më e mirë, zbutje e simptomave të astmës, tharje më e vogël e gojës dhe zgjim më energjik. Disa madje pretendojnë se kjo metodë ndikon pozitivisht në përmirësimin e lëkurës, tretjes, humorit dhe madje edhe në formësimin e nofullës.

Por çfarë thotë shkenca për këtë praktikë në rritje? Qëllimi i kësaj praktike është të inkurajojë frymëmarrjen përmes hundës, gjë që konsiderohet më e shëndetshme sesa frymëmarrja përmes gojës. Kur hundët janë të bllokuara, trupi automatikisht kalon në frymëmarrje përmes gojës – një veprim që mund të lidhet me probleme si apneja e gjumit, një gjendje ku rrugët e frymëmarrjes bllokohen përkohësisht gjatë gjumit.

ÇFARË TREGOJNË STUDIMET SHKENCORE?
Një studim i ri i realizuar nga studiues kanadezë shqyrtoi të gjitha studimet shkencore mbi këtë praktikë, duke u fokusuar veçanërisht te personat me frymëmarrje nga goja ose me çrregullime të gjumit si apneja. Ata analizuan dhjetë studime të publikuara ndërmjet viteve 1999 dhe 2024 me një total prej 213 pjesëmarrësish. Vetëm dy nga studimet treguan përmirësime modeste për personat me apne të lehtë – si rritje të nivelit të oksigjenit në gjak dhe ulje të numrit të apneve për orë. Megjithatë, këto përmirësime ishin statistikisht të rëndësishme, por jo klinikisht të rëndësishme – domethënë, ndryshimet nuk janë të mjaftueshme për të ndikuar në trajtimin apo ndjesinë e gjumit.

A KA RREZIQE?
Katër nga studimet e shqyrtuara raportuan rreziqe serioze, përfshirë edhe rrezikun e asfiksisë – mungesës së oksigjenit që mund të çojë në humbje ndjenje apo edhe vdekje. Ky rrezik është veçanërisht i madh për njerëzit që kanë hundë të bllokuara për shkak të alergjive, devijimit të septumit, bajameve të zmadhuara ose çrregullimeve të tjera.

Studiuesit përfunduan se ky trend ka shumë pak përfitime dhe mund të paraqesë rreziqe serioze, veçanërisht për ata që vuajnë nga probleme me frymëmarrjen. Sipas profesionistëve të shëndetit të gjumit, kjo praktikë nuk rekomandohet, sidomos për personat me probleme respiratore ose gjumë të çrregullt. Mbyllja e gojës me ngjitës nuk duhet të provohet te fëmijët, dhe për të rriturit, duhet pasur shumë kujdes.

/koha.mk