Mbi 10.000 vende të lira pune në Maqedoni ?

Tregu i punës në Maqedoninë e Veriut vazhdon të përballet me mungesë të fuqisë punëtore, por kërkesa më e madhe për punësime të reja nuk është në sektorët me pagat më të larta. Sipas të dhënave më të fundit të publikuara nga Enti Shtetëror i Statistikave për tremujorin e parë të vitit 2026, në vend ka 10.247 vende të lira pune, ndërsa numri i vendeve të plotësuara të punës arrin në 484.199.

Nevoja më e madhe për punëtorë është në sektorin e akomodimit dhe shërbimit të ushqimit, ku shkalla e vendeve të lira të punës ka arritur në 4,94 për qind. Kërkesë e lartë ka edhe në veprimtaritë administrative dhe shërbimet mbështetëse, me një normë prej 4,80 për qind.

Sipas profesioneve, numri më i madh i vendeve të lira është për punonjës në shërbime dhe shitje, me 2.346 pozita të hapura. Pasojnë industria përpunuese me 2.174 vende të lira dhe tregtia me shumicë e pakicë me 2.067 vende të lira pune.

Të dhënat tregojnë se shumica e vendeve të hapura janë të përqendruara në sektorë me paga të ulëta dhe mesatare. Nga ana tjetër, sektori i furnizimit me energji elektrike, gaz, avull dhe klimatizim ka normën më të ulët të vendeve të lira të punës, vetëm 0,15 për qind.

Sipas shpërndarjes rajonale, norma më e lartë e vendeve të lira të punës është në Rajoni i Vardarit, me 2,28 për qind. Kërkesa më e madhe për punonjës të rinj vërehet te kompanitë me 10 deri në 49 të punësuar, ku norma arrin në 3,05 për qind.

Statistikat tregojnë se shkalla e vendeve të lira të punës mbetet relativisht stabile krahasuar me vitin e kaluar, duke u lëvizur ndërmjet 2,02 dhe 2,14 për qind.

Në vend janë regjistruar 707.385 persona të punësuar dhe 90.499 të papunë. Nga të papunët, 62,4 për qind janë burra dhe 37,6 për qind gra. Ndërsa te të punësuarit, 57,9 për qind janë burra dhe 42,1 për qind gra.

Ndërkohë, punësimi joformal po shënon rritje. Janë regjistruar 94.197 persona që punojnë në mënyrë joformale, që paraqet një rritje prej 4,3 për qind krahasuar me tremujorin e mëparshëm. Pjesa më e madhe e tyre janë të angazhuar në bujqësi dhe ndërtimtari.

Interesante është se sektorët me pagat më të larta nuk kanë numër të madh vendesh të lira pune. Në transport dhe magazinim ka 757 pozita të hapura, në ndërtimtari mungojnë 639 punëtorë, në telekomunikacion dhe programim kompjuterik kërkohen 412 persona, ndërsa në miniera ka vetëm 21 vende të lira.

Sipas analizës së Finance Think, pagat në transport, telekomunikacion, transport ajror dhe industrinë farmaceutike lëvizin ndërmjet 67.041 dhe 75.976 denarëve. Rreth 1.000 euro në muaj fitojnë edhe të punësuarit në shërbimet financiare, prodhimin e pijeve, nxjerrjen e xeheve metalike dhe veprimtaritë menaxheriale.

Pagat më të larta vazhdojnë të regjistrohen në sektorin e teknologjisë së informacionit dhe komunikimit, ku paga mesatare neto në muajin mars arriti në 115.557 denarë. Për krahasim, paga mesatare neto në nivel shtetëror gjatë të njëjtës periudhë ishte 48.433 denarë.

/ts