Ambasadori i Maqedonisë së Veriut në mesin e SHH „Cërvica“ Zvicër
Shoqata Humanitare Cërvica në Zvicër shënoi me dinjitet dhe sukses 17-vjetorin e themelimit të saj, duke e lidhur këtë përvjetor me 17-vjetorin e shpalljes së Pavarësisë së Republikës së Kosovës. Me nder dhe kënaqësi të veçantë, mora pjesë në këtë ngjarje të rëndësishme, me ftesë të kryesisë së Shoqatës dhe kryetarit z. Ali Spahiu.
Pavarësia e Kosovës përbën një nga momentet më madhore të historisë sonë kombëtare, një akt i guximshëm dhe i drejtë që përfaqëson përkushtimin dhe sakrificën e brezave të tërë për liri dhe shtetndërtim.
Të shënojmë këtë ditë të rëndësishme bashkë me bashkatdhetarët tanë në Zvicër dhe me anëtarët e Shoqatës Humanitare Cërvica ishte një përvojë frymëzuese dhe emocionuese, që dëshmon fuqinë e diasporës sonë në ruajtjen e identitetit kombëtar dhe mbështetjen e Kosovës në rrugëtimin e saj drejt zhvillimit dhe konsolidimit ndërkombëtar.
Shpreh mirënjohjen time të thellë për mikpritjen e ngrohtë dhe për organizimin e shkëlqyer të këtij manifestimi. Përkushtimi juaj i palëkundur për ta mbajtur gjallë frymën kombëtare dhe për të ndihmuar komunitetin është për t’u vlerësuar dhe për t’u marrë si shembull.
Me respekt të lartë,
Ambasadori i Republikës së Maqedonisë së Veriut në Bern
Shkruan Rexhep Demiri në facebook
/ms
