Maqedonia Shteti i tragjedive..!

Tragjedia e ndodhur “të dielën e zezë” në Koçanë morri jetën e 59 të rinjve dhe qindra të tjerë u lënduan rëndë! Sipas vlerësimeve të para bëhet fjalë për njërën ndër ngjarjet më të rënda dhe tragjike të kësaj natyre në Evropë! Në vendin tonë është njëra nga tragjeditë më të mëdha për kah numri i viktimave.

Si zakonisht kur ndodhin tragjedi të këtilla, politika në vend që të hesht, tenton të kritikojë ose të vetëmbrohet. Opozita akuzon pushtetin aktual, ndërsa qeverisja hedh fajin tek pushteti i kaluar! Lojë e stërnjohur politike 35 vjet me radhë.

Ndonjëherë edhe fjalët janë të tepërta, por heshtja nuk është ar e as argjend. Kjo ngjarje e përmasave tragjike dëshmon për të satën herën brishtësinë e sistemit përkatësisht mosfunksionimin e institucioneve. Kërkohet përgjegjësi për lejen e punës, e cila paska qenë e falsifikuar apo jolegale, gjë që tregon se në këtë vend inspektoratet as s’i bëjnë kontrollet e duhura, e as subjektet e ndryshme ekonomike nuk bëjnë përpjekje minimale që të sigurojnë kushtet e nevojshme të funksionimit në bazë të ligjit. “Korrupsioni vret”, kjo është thënia më e mirë, e cila i përshtatet sistemit tonë.

Ministria e Brendshme është dashur të sigurojë mbarëvajtjen e koncertit brenda objektit, pasi çdo ngjarje, sidomos me këtë masivitet paraprakisht njoftohet tek organet e rendit dhe ato bëjnë vlerësimin lidhur me sigurinë e saj. Por, policia si duke ka munguar në këtë ngjarje! Drejtoria e Mbrojtjes dhe Shpëtimit ka njoftuar se nga objekti në Koçanë asnjëherë nuk është kërkuar Elaborat për mbrojtje kundër zjarrit.

Por, edhe nëse nuk është kërkuar elaborat, si ka mundur pronari i objektit të mos sigurojë kapacitetet e duhura që garantojnë siguri minimale në raste të katastrofave natyrore ose të shkaktuara nga faktori njeri. Cili inspektorat e bën punën e tij dhe i dënon shkelësit e ligjit, kur dihet se vendi është i vogël, kur secili njihet me secilin, ndërsa partitë kanë ndikim të madh ndaj punës së tyre. Komuna thua se nuk e ka ditur, po partitë me degët e tyre lokale në Koçanë nuk e kanë ditur se në çfarë objekti organizohet koncerti?

Kush e di sa objekte funksionojnë pa pasur sistem të mbrojtjes dhe sigurisë dhe pa përmbushur standardet e nevojshme teknike, si për shembull kafene, restorante dasmash e diskoteka tjera, pasi këtë e ka mundësuar ajo që shpesh flitet në shtet: mendësia e brumosur partiake dhe lidhjet me të “fortin”! Ky është vendi në të cilin mbijeton ai që e ka “shpinën e fortë”, ndërsa i drejti mund edhe ta pësojë!

Në instalimin e kësaj mendësie dhe sistemi, të cilit i shkon emërtimi “moçalik” kanë kontribuar të gjitha partitë politike, pa përjashtim, edhe këto që janë në pushtet, por edhe ata që kanë qenë! Kush më pak e kush më shumë.

Në stilin popullor, është bërë kulturë jetese këtu në vendin tonë funksionimi në stilin “Hajt, se e kam njerin”, “Aty është njeri jonë” e fraza të ngjashme korruptuese popullore. Nëse reagon ndaj kësaj mënyre dukesh naiv, i pagjindshëm, i papërshtatshëm, kritik i pandreqshëm, lojtar i dobët i skenës publike, “skandinav” në Ballkan dhe etiketohesh me epitete të shumta. E pas kësaj e kotë, shumë e kotë është pyetja “Pse ikin të rinjtë”?

Gjithsesi se në vendin tonë nuk reagohet në mënyrë parandaluese, por pasi të ndodh ndonjë ngjarje e rëndë me shumë viktima.

Se përgjegjësia është e sistemit u pa pas protestave që ndodhën pas vrasjes së 28 vjeçares Frosina Kullakovës, e cila u përplas me makinë nga një 22 vjeçar në gjendje të alkoolizuar dhe të droguar. Aksioni nxit reaksionin, andaj u shtuan kontrollet e policisë në trafik dhe siç u pa një numër i madh vozisin pa leje! Potencialisht rrugët e vendit janë të “vdekjes”, sepse mediat raportojnë shpesh për shkeljen e këmbësorëve nga “kapadainjtë” e makinave luksoze.

Në analizën me titull “Politika derdh lot krokodilli për drejtësi” thamë që “Humbja e jetës së Frosinës, nxori në syprinë faktin që “të fortit” e bëjnë ligjin apo siç do të kishin thënë në Shqipëri “Ligjin e bën Maliqi”. E drejta e jetës shpesh fatkeqësisht nuk garantohet nga institucionet, nga ata që nga paguhen nga buxheti për sigurinë tonë fizike”.

Historia fatkeqësisht përsëritet në vend dhe instalimi i parimit të mosndëshkueshmërisë sikur ndikon në përsëritjen e tragjedive!

Maqedonia e Veriut është shtet i vogël, por i tragjedive të mëdha!
Historia e saj shënon disa tragjedi, të shkaktuara nga faktori njeri. Do të bëjmë një telegrafikim historiografik mbi tragjeditë me pasoja në njerëz.
05 mars, 1993 –Rrëzohet aeroplani me 79 udhëtarë dhe katër anëtarë të ekipit, i kompanisë “Paler Makedonija”! Aeroplani është rrëzuar menjëherë pas aterimit në Aeroportin e Shkupit.

22, nëntor, 1993 –Rrëzohet aeroplani i tipit “Jak – 42D”, ndërsa jetën e humbën 115 persona, vetëm një i ka mbijetuar fatkeqësisë, por më vonë ka vdekur në Spitalin e Ohrit. U rrëzua në afërsi të Malin Trojan, ndërsa ka fluturuar nga Gjeneva për në Shkup, por për shkak të kushteve të këqija të motit është ridrejtuar për në Aeroportin e Ohrit për ulje të patjetërsueshme.

26 shkurt, 2004 –Humb jetën presidenti i dytë i Maqedonisë së Veriut, Boris Trakovskit, bashkë me gjashtë bashkëpunëtorë dhe dy pilotë të avionit të shtetit “Kinger”. Ngjarja ndodhi në fshatin Rotimlje, në afërsi të Mostarit. Sipas hetimeve të kryera nga autoritetet e Bosnjë e Hercegovinës dhe Maqedonisë së Veriut, shkaku i aksidentit ishin “gabimi procedural i ekipit të pilotëve gjatë aterimit në aeroportin e Mostarit, e cila ka çuar deri tek ajo që aeroplani të godasë një kodër.

05, shtator, 2009 – Nga fundosja e anijes “Ilinden” në Ohër 15 persona humbën jetën. Ishin turistë nga Bullgaria, ndërsa shkak i vdekjes së tyre ishte defekti i anijes.

13 shkurt, 2019 – 16 persona humbën jetën tragjikisht në afërsi të fshatit Llaskarcë, në rrugën Shkup– Tetovë, si pasojë eaksidentit të autobusit të kompanisë “Durmo Turs” nga Gostivari. Nga raportimet e mediave fajin fokusohet tek frenat e autobusit. Procesi gjyqësor gjendet në Gjykatën e Apelit, ndërsa më 2 dhe 3 prill pritet të mbahet seancë publike.

5 tetor, 2021–Zjarri që shpërtheu në Spitalin Modular në Tetovë ua mori jetën 14 personave, ndërsa u lënduan dhjetëra të tjerë. Zjarri u shkaktua nga një kabllo vazhduese, ku ishte vendosur pajisja për trajtimin e pacientëve në rast të ndonjë sulmi kardiak. Në këtë përfundim doli Prokuroria Themelore Publike e Tetovës. Epilog dhe përgjegjësi për njerëz nuk ka! Njëherë për njëherë fajin e ka kablloja! Tragjedi në tragjedi!

23 nëntor, 2021– Nga aksidenti fatal i autobusit të kompanisë “Besa Trans” në Bullgari humbën jetën 45 shtetas të Maqedonisë së Veriut, derisa ktheheshin nga Stambolli. Shkaku kryesor për aksidentin sipas autoriteteve bullgare ka qenë faktori njeri, apo shoferi i ndjerë i autobusit, i cili ka vozitur me shpejtësi më të madhe se sa që është lejuar në atë pjesë ku ka ndodhur aksidenti. Procesi gjyqësor ende është pa epilog lidhur me licencën e autobusit të aksidentuar, e cila sipas Prokurorisë, BESA Trans e ka falsifikuar.
Pra përgjegjësia iu atribua një personi i cili nuk është në mesin tonë!
Gjithnjë e më shumë po bindemi se “Tek ne ka, por në fakt s’ka ligje!”
Shkruan: Sefer TAHIRI

/lajmpress