Maqedonia ka 17 mijë nxënës më pak, ndërsa numri i studentëve është zvogëluar për 7 mijë..!
Për shtatë vite në vend ka 17 mijë nxënës më pak, ndërsa numri i studentëve është zvogëluar për 7 mijë. Të dhënat u prezantuan në një ngjarje në Fakultetin Ekonomik në Shkup, ku u prezantuan rezultatet e projektit “Skills4Justice”, i cili trajton çështjet që kanë të bëjnë me migrimin e popullsisë dhe që zbatohet në kuadër të programit Horizon të Bashkimit Evropian.
“Ne po përpiqemi të përmirësojmë cilësinë e arsimit, gjë që në të kaluarën shpesh ishte arsyeja që të rinjtë të largoheshin në vende të tjera në kërkim të mundësive më të mira arsimore. Ne do të bëjmë ndryshime të mëdha, por nevojitet një bashkëpunim më i fortë me të gjithë aktorët, veçanërisht universitetet dhe komunitetin e biznesit, për të ndaluar procesin e migrimit”, theksoi sot ministrja e Arsimit dhe Shkencës, Vesna Janevska.
Ajo shtoi se Ministria aktualisht është duke kryer një anketë ku janë përfshirë të gjitha universitetet shtetërore dhe gjenerata e studentëve të diplomuar në vitin akademik 2022/2023, për të parë se cila është shkalla e punësimit, pra nëse këta studentë kanë qenë të punësuar dhe për sa kohë pas diplomimit, nëse njohuritë dhe aftësitë e fituara janë të zbatueshme për ta në vendin e punës, nëse janë të kënaqur me të ardhurat nga puna, etj.
“Do të na ndihmojë të shohim më saktë se çfarë cilësie prodhojnë universitetet tona dhe çfarë duhet ndryshuar”, tha Janevska.
Hulumtimi duhet të tregojë nëse nevojiten programe të reja studimi, nëse është mirë futja e studimeve ndërdisiplinore, mësimi më praktik në fakultete të caktuara, ripërcaktimi i kuotave.
Ministrja informoi se është duke u përgatitur një ligj i ri për arsimin e lartë, i cili do të jetë një bazë e mirë për arsimin e lartë.
Kujtojmë se hulumtimi i Qendrës për Komunikime Civile (QKC), sipas të dhënave të Entit Shtetëror të Statistikave (ESHS), tregoi se në vetëm dhjetë vjet, në vend ka dhjetë përqind më pak nxënës në shkollat fillore dhe të mesme. Në shifra absolute, pra 27 mijë nxënës më pak.
/ts
