Maqedoni: Rritje prej 41 për qind të numrit të udhëtarëve të transportuar përmes aeroporteve..

Përmes Aeroportit ndërkombëtar të Shkupit dhe Sh. Apostoll Pavle Ohër në gjysmën e parë të vitit janë transportuar 1.338.406 pasagjerë që paraqet rritje vjetore prej 41 për qind, kumtoi sot koncesionari i aeroportit TAV Maqedoni.

Krahasuar me vitin 2019 i cili konsiderohet si vit reference në aviacion, sepse ishte viti më i fuqishëm për sa i përket qarkullimit të pasagjerëve përpara se të ndodhte kriza me Kovid-19, TAV Maqedoni ka 15 për qind më shumë pasagjerë në gjysmën e parë të këtij viti.

Sa i përket numrit të fluturimeve për të njëjtën periudhë, te të dy aeroportet e Maqedonisë së Veriut ka rritje prej 23 për qind, ose gjithsej 10.299 fluturime të kryera nga janari deri në qershor të vitit 2023.
“Duke pasur parasysh se sezoni i verës është në rrjedhë dhe me shifrat e përmbledhura të komunikacionit ajror për gjysmën e parë të vitit 2023, ose për periudhën janar – qershor, si TAV, ne kemi kënaqësinë të vërejmë një trend të fortë pozitiv të rimëkëmbjes dhe rritjes së numrit të pasagjerëve.

Jo vetëm që vazhdon trendi pozitiv nga viti 2022, por është tejkaluar edhe për 41 për qind, ndërsa parashikimet e ACI-së se trafiku i pasagjerëve në aeroportet evropiane do të jetë 9 për qind më i ulët këtë vit krahasuar me vitin 2019, janë më se të tejkaluara në vendin tonë.

Ne kemi 15 për qind më shumë pasagjerë se viti 2019 i cili ishte viti më i fuqishëm për komunikacionin ajror para krizës së Kovid-19. Një rritje e tillë e numrit të pasagjerëve është dëshmi dhe rezultat i përkushtimit, angazhimit dhe orientimit tonë drejt rezultateve dhe klientëve tanë dhe menaxhimit të mirë”, deklaroi Nexhat Kurt, drejtor gjeneral i TAV Maqedoni.

Në TAV Maqedoni theksojnë se linjat e reja ajrore dhe kompanitë e reja ajrore që kanë hyrë në tregun e aviacionit të Maqedonisë në muajt e fundit, përveç linjave ajrore të rregullta gjatë gjithë vitit dhe fluturimeve tradicionale sezonale dhe ato çarter gjatë verës, paraqesin një kontribut tjetër shtesë për rezultatet në rritje të vazhdueshme (në aeroportin e Shkupit: Frankfurt me Luftansa; Split me Kroacia erlajns; Oslo me Norvexhian; në aeroportin e Ohrit: fluturime sezonale nga Mançesteri dhe Londër-Getvik me TUI dhe Beograd me Er Serbia).

Destinacione më të shpeshta nga Aeroporti ndërkombëtar i Shkupit sipas statistikave të komunikacionit ajror të pasagjerëve të TAV Maqedoni, për gjysmën e parë të vitit 2023, janar – qershor, ishin Stambolli (dy aeroportet IGA dhe Sabiha Gokçen me 11.4 për qind të tregut), Bazel Miluz (6.7 përqind), Cyrih (5.9 për qind), Dortmund (4.9 për qind), Vjenë (4.6 për qind), ndjekur nga Mynih Memingen (4.3 për qind), Frankfurt (3.5 për qind), Malmo (2.9 për qind) dhe Kelni (2.6 për qind).

Top pesë vendet me fluturime direkte për periudhën janar – qershor 2023 kanë qenë Gjermania (27.9 për qind e tregut); Zvicra (14,6 për qind); Turqia (14,5 për qind); Italia (7.4 për qind) dhe Suedia (6.9 për qind).

Lidhur me pjesëmarrjen e linjave ajrore në qarkullimin e udhëtarëve në 6 muajt e parë të vitit 2023 në aeroportin e Shkupit, Viz Er ka numrin më të madh të pasagjerëve në (64.6 për qind të pjesës së tregut), ndjekur nga Turkish erlajns (6.6 përqind), Pegasus Airlines (6.5 përqind), Austrian erlajns (4.6 përqind), Çer erlajns (4 përqind).

Në Aeroportin e Ohrit, në gjysmën e parë të vitit 2023, destinacioni më i shpeshtë i udhëtimit ka qenë Bazeli (23,7 për qind), pastaj Vjena (22,6 për qind), Dortmundi (17,9 për qind), Memingen (11,8 për qind), Malmo (8,6 për qind), Cyrihu (8,4 për qind), Amsterdami (6,1 për qind) dhe pjesa tjetër e destinacioneve ka një pjesë të tregut 2.2 për qind të destinacioneve.

Aktualisht dhe sipas orarit të fluturimeve gjatë verës, nga Aeroporti ndërkombëtar i Shkupit fluturojnë 21 kompani ajrore në 47 destinacione, ndërsa nga aeroporti Shën Apostol Pavle Ohër, gjashtë kompani ajrore fluturojnë në 12 destinacione.

/zhurnal