Maqedoni për shkak të borës, shumë rrugë mbeten të bllokuara..!?

Reshjet e dendura të borës në Malin Bistra këtë fundjavë ka paralizuar fshatin Leunovë të Mavrovës. Ndonëse Qendra për Menaxhim me Kriza thotë se rrugët janë pastruar dhe të gjithë banorët nga Leunova janë evakuuar, rruga Leunovë-Mavrovë është ende e pakalueshme për të dytën ditë, ndërsa pesë vetura me fëmijë mbeten të bllokuar.

Një qytetare përmes profilit të saj në facebook ka njoftuar se një kolonë me rreth 30 automjete prej disa orësh po tenton të depërtojë rrugën nga fshati Leunovë e Mavrovës në drejtim të vendpushimit Bunec, por për shkak të rrugës së bllokuar nga bora, nuk mund të lëvizin dhe nuk marrin përgjigje për ndihmë nga autoritetet kompetente.

“Për momentin jemi më shumë se 25 vetura, mes neve ka edhe gra shtatzëna dhe fëmijë. Rruga drejt Bunecit është e pakalueshme, jemi paraqitur tek të gjitha shërbimet, por nuk ka asnjë reagim”, tha një qytetare.

Nga Qendra për Menaxhim me Kriza thonë se në rrugët që kanë mbetur këta banorë, janë lokale dhe se nuk janë në kompetencë të tyre por të komunës së Mavrovë-Rosushtë. Megjithatë, sipas informacioneve të tyre, ekipet tani janë në terren dhe do t’i evakuojnë banorët.

Autoritetet apelojnë tek qytetarët që t’u përmbahen rekomandimeve. Ndërkaq, komunikacioni në rrugët e shtetit po zhvillohet në kushte të dimrit . Ndalesa për qarkullim për automjete të rënda ka në zonën malore Mavrovë.

Në drejtimin rrugor Tetovë- Kodër e Diellit është vendosur ndalesë për automjete të rënda në drejtim të fshatit Lisec, ndërsa për automjetet e tjera është i detyrueshëm përdorimi i pajisjes dimërore. Në fshatrat Tanushë, Brezë dhe Malinë ka borë edhe erë dhe rruga është e pakalueshme.

/Alsat.mk