Maqedoni: Jeta e një punëtori vlen vetëm 5.000 euro ?

Aksidentet në vendin e punës mbeten një problem serioz në Maqedoni. Çdo vit lëndohen mbi 200 punëtorë dhe më shumë se dhjetë humbin jetën. Nga viti 2021 deri në fund të vitit 2025 janë regjistruar mbi 1.000 aksidente, çka tregon nevojën urgjente për siguri më të madhe në punë. Vetëm gjatë vitit 2025 janë evidentuar 242 aksidente, prej të cilave 12 me fatalitet.

Sipas Ivan Peshevskit, kryetar i Sindikatës së Ndërtimtarisë, sektorët më të rrezikshëm janë ndërtimtaria dhe bujqësia, ku numri i të lënduarve dhe i viktimave po rritet nga viti në vit. Shkaqet kryesore janë mungesa e pajisjeve mbrojtëse, makineritë e pasigurta, mungesa e kuadrit të kualifikuar dhe presioni ndaj punëtorëve për të pranuar punë të rrezikshme.

Peshevski thekson se Ligji i ri për siguri dhe shëndet në punë po shtyhet vazhdimisht, ndërkohë që aksidentet fatale arrijnë mesatarisht mbi 20 raste në vit. Përveç ndërtimtarisë, shumë lëndime regjistrohen edhe në bujqësi, industri metalike, pylltari, komunikacion dhe transport, ndërsa sëmundjet profesionale pothuajse nuk evidentohen në dokumentet zyrtare.

Në rast vdekjeje në punë, familja e viktimës merr vetëm 5.000 euro dëmshpërblim, shumë që sindikatat e cilësojnë si të pamjaftueshme. Kushtet e këqija të punës, pagat e ulëta dhe trajtimi i pabarabartë kanë shkaktuar ikje masive të kuadrove të kualifikuara nga vendi, duke rrezikuar realizimin e projekteve infrastrukturore.

Sipas Peshevskit, siguria dhe shëndeti në punë duhet të trajtohen si investim dhe jo si shpenzim, ndërsa pagat dinjitoze dhe kushtet e sigurta janë parakusht për punëtorë produktivë dhe të mbrojtur.

/lajmpress