Maqedoni : 353 vetë në regjistrin e pedofilëve

Maqedonia e Veriut është shteti i vetëm në rajon që u mundëson qytetarëve qasje online në një regjistër publik të personave të dënuar për pedofili, ku publikohen fotografitë, pseudonimet, adresat dhe veprat për të cilat janë dënuar. Regjistri, i disponueshëm aktualisht vetëm në maqedonisht (www.registarnapedofili.mk
), përmban emrat e 353 personave, 14 prej tyre gra, ndërsa po punohet që faqja të jetë edhe në shqip.

Regjistri u krijua në vitin 2012 me një ligj të posaçëm që përcakton 11 vepra penale përfshirë sulmet seksuale ndaj të miturve, pornografinë me fëmijë, prostitucionin e fëmijëve, incestin dhe trafikimin e të miturve. Ai përditësohet rregullisht me të dhëna të reja nga institucionet kompetente.

Organizata për të drejtat e fëmijëve “Megjashi” e konsideron regjistrin një hap pozitiv, por jo të mjaftueshëm, duke theksuar se mbrojtja e fëmijëve kërkon një strategji më të gjerë me parandalim, edukim sistematik, ndërhyrje të hershme dhe mbështetje për viktimat. Përmes linjës së tyre të ndihmës “Alo Bushavko”, në pesë vitet e fundit janë raportuar disa raste që lidhen me pornografi të miturish dhe shfrytëzim seksual online.

Sipas ekspertëve, parandalimi është thelbësor pasi personat e dënuar për abuzim seksual ndaj fëmijëve kanë rrezik të përsërisin veprën. Regjistri u mundëson prindërve të kontrollojnë nëse persona në kontakt me fëmijët e tyre kanë qenë të dënuar më parë për këto krime.

Sipas Ministrisë së Brendshme, nga viti 2021 deri në vitin 2025 janë raportuar 472 raste të abuzimit seksual ndaj fëmijëve, me një rritje të denoncimeve ndër vite. Ndryshimet ligjore në vitin 2023, që rritën moshën e viktimës nga 14 në 15 vjeç, kanë ndikuar gjithashtu në shtimin e rasteve të raportuara. Legjislacioni parashikon edhe mundësinë e kastrimit kimik për të dënuarit për këto vepra.

/lajmpress