Maduro largohet nga pushteti, do të gjykohet në SHBA!
Presidenti venezuelian Nicolas Maduro është larguar nga pushteti, njoftoi Presidenti amerikan Donald Trump, pasi SHBA-të kryen një seri sulmesh ajrore në Venezuelë, përfshirë kryeqytetin e saj Karakas. Kreu i Shtëpisë së Bardhë njoftoi se gjatë këtij aksioni, Presidenti Maduro dhe gruaja e tij u kapën.
“Shtetet e Bashkuara të Amerikës kryen me sukses një sulm të madh ndaj Venezuelës dhe udhëheqësit të saj, Presidentit Nicolas Maduro, i cili, së bashku me gruan e tij, u kap dhe u dëbua nga vendi. Ky operacion u krye në bashkëpunim me agjencitë amerikane të zbatimit të ligjit”. – deklaroi Presidenti i SHBA-ve, Donald Trump.
Sekretari i Shtetit Rubio shtoi se Maduro do të gjykohet për akuza penale në SHBA dhe nuk pret veprime të mëtejshme kundër Venezuelës. Megjithëse në kolaps të plotë, qeveria venezueliane, përmes Zëvendëspresidentes Rodriguez, i mohoi këto pretendime dhe kërkoi “prova jete” për presidentin.
“Jemi vërtet të indinjuar nga kjo situatë brutale dhe ky sulm brutal, nuk e dimë se ku janë Presidenti Maduro dhe zonja e parë. Ne kërkojmë që qeveria e Presidentit Trump të japë menjëherë prova për jetën e tyre.” – deklaroi Delcy Rodriguez, Zv.Presidente e Venezuelës.
Ndërsa Shtëpia e Bardhë këmbëngul në një operacion kundër narko-terrorizmit, Karakasi zyrtar ka akuzuar Uashingtonin për një pushtim klasik imperialist që synon plaçkitjen e burimeve të naftës.
“Përballë këtij sulmi tinëzar dhe frikacak që kërcënon paqen dhe stabilitetin e rajonit, ne ngremë protestën më të fortë të mundshme para bashkësisë ndërkombëtare, duke kërkuar dënimin e qeverisë amerikane për shkeljen flagrante të Kartës së OKB-së. Ky pushtim përfaqëson zemërimin më të madh që ka pësuar vendi. Ata na sulmuan, por nuk do të na nënshtrojnë.” – u shpreh Ministri i Mbrojtjes së Venezuelës, Vladimir Padrino Lopez.
Ndërsa opozita venezueliane pretendon se kjo ishte një marrëveshje midis Trump dhe Maduros. Rusia dhe Kina e dënuan sulmin.
“Jemi jashtëzakonisht të alarmuar nga raportet se Presidenti Venezuelës Nicolas Maduro dhe gruaja e tij u larguan me forcë nga vendi si rezultat i veprimeve agresive të sotme nga Shtetet e Bashkuara. Ne bëjmë thirrje për një sqarim urgjent të kësaj situate.” – thuhet në Komunikatën e Ministrisë së jashtme ruse.
Bashkimi Evropian bëri thirrje për përmbajtje dhe respekt për të drejtën ndërkombëtare. Uashingtoni pretendon se Maduro ka destabilizuar qëllimisht Amerikën përmes migracionit dhe krimit, duke e konsideruar ndërhyrjen ushtarake të nevojshme për të mbrojtur sigurinë kombëtare.
Sulmi vjen vetëm një ditë pasi Maduro ofroi dialog mbi naftën dhe migracionin.
/tvm2
