Limani: Këto zgjedhje janë për të ardhmen e sigurt të Kërçovës

Kërçova sot ishte epiqendra e, siç thuhet në njoftimin e VLEN-it, shpresës dhe e ndryshimit!
“Me qindra qytetarë, të rinj e të moshuar, u bashkuan në një tubim madhështor për të përkrahur kandidatin e VLEN-it për kryetar të Komunës së Kërçovës, Fatmir Limanin.

Atmosfera ishte e zjarrtë, e mbushur me energji, besim dhe vendosmëri për ta kthyer Kërçovën në një histori suksesi”, thuhet në komunikatln e VLEN-it, ndërsa shtojnë se prania e liderëve Izet Mexhiti, Zeqirija Ibrahimi, Bilall Kasami dhe Arben Fetai, e bëri këtë tubim një manifestim të madh kombëtar.

Fatmir Limani, siç theksohet në komunikatë, u prezantua si simbol i bashkimit, i rinisë dhe i progresit.
Me këtë rast, kandidati për Kërçovën theksoi se Programi i tij nuk është thjesht një plan pune, por një vizion i qartë për transformimin e qytetit: Kërçovë me arsim modern dhe çerdhe për çdo fëmijë, Kërçovë të teknologjisë dhe inovacionit, ku rinia gjen hapësirë për të lulëzuar, Kërçovë të sportit, kulturës dhe turizmit, që do të lidhë brezat dhe do të tërheqë vizitorë, Kërçovë të shëndetësisë moderne me investime kapitale, Kërçovë me rrugë, infrastrukturë dhe urbanizim bashkëkohor, Kërçovë ku çdo qytetar ndihet i përfaqësuar dhe i respektuar.

“Limani theksoi se këto zgjedhje nuk janë beteja për feude të vjetra politike, por referendum për qytetarin, për rininë dhe për të ardhmen e sigurt të Kërçovës. Entuziazmi i qytetarëve tregoi qartë se Fatmir Limani është jo vetëm kandidati i VLEN-it, por kandidati i gjithë Kërçovës. Tubimi i sotëm ishte më shumë se një mbledhje, ishte një shpërthim i energjisë popullore, një betim i heshtur se Kërçova do të jetë flamurtare e ndryshimit”, thuhet në njoftimin e VLEN-it.

/koha.mk