Lidl vjen edhe në Kërçovë

Shkupi, Tetova, Kumanova, Kërçova, Shtipi, Manastiri, Kavadari, Velesi, Strumica… këto janë disa nga qytetet ku “Lidl” do të hapë supermarketet në Maqedoni. Edhe pse nuk ka datë të saktë për hapjen e tyre, megjithatë shpalljet e shumta për vende pune, si dhe disa nga kryetarët e komunave konfirmojnë se me gjasë – fund i vitit do të jetë periudha kur do të hapen pikat shitëse të gjigantit gjerman.

Rrjeti i marketeve do të blejë edhe produkte bujqësore dhe të ëmbëlsirave industriale nga rajoni jonë dhe do t’i shesë në tregjet e tij në vend, si dhe në dyqane të tjera në fqinjësi. “Lidl”, siç është paralajmëruar tashmë, do të ofrojë çmime më të ulëta të produkteve me pakicë dhe paga më të larta për punonjësit. Aktualisht ndër të tjera janë shpallur vende pune për zëvendësmenaxherë në më shumë markete në tërë vendin, raporton KOHA.

Kompania ka angazhuar deri tani mbi 200 punonjës, dhe numri i tyre vetëm se do të rritet në të ardhmen. Ndër shpalljet e fundit të “Lidl” kanë qenë edhe ato për pozitat e specialistit të pagave dhe administrimit, përkthyes (shitje), ekspert në HACCP, si dhe në organizimin dhe transformimin e burimeve njerëzore. Në periudhën e kaluar, në vazhdimësi ka pasur shpallje për vende të ndryshme pune.

Vetëm në vitin e kaluar janë angazhuar më shumë punonjës që i janë bashkuar ekipeve të shitjeve, zinxhirit të furnizimit, logjistikës, burimeve njerëzore, prokurimit, IT dhe kontabilitetit, financave dhe taksave. Në fillim të javës, kryetari i Komunës së Kumanovës, Maksim Dimitrievski, vizitoi qendrën logjistike dhe distributore që po ndërton kompania gjermane “Lidl” në zonën industriale të Reçicës, afër Kumanovës. Ky projekt strategjik është i një rëndësie të madhe për zhvillimin ekonomik të rajonit dhe paraqet një investim të rëndësishëm të huaj në Maqedoninë e Veriut.

“Ndërtimi i kompleksit po ecën sipas dinamikës së planifikuar dhe aktualisht është në fazën e mbylljes së magazinës. Qendra logjistike e ‘Lidl’ mbulon një sipërfaqe prej 64.000 metrash katrorë brenda kompleksit prej 170 hektarësh. Vlera e investimit është 80 milionë euro dhe pas përfundimit të projektit, pritet të hapen 150 vende të reja pune, të cilat do të ndikojnë ndjeshëm në ekonominë vendase”, tha kryetari i Kumanovës, Maksim Dimitrievski.

Dy marketet “Lidl” në Shtip do të jenë gati në vitin 2025, njoftoi muajin e kaluar kryetari i kësaj komune Ivan Jordanov. Njëra është tashmë në ndërtim e sipër dhe tjetra pritet të fillojë funksionimin në muajt e ardhshëm. “Shikoni, kjo është ende një kompani private, e cila përcakton sipas planeve të saj dinamikën e investimit dhe të ndërtimit. Ajo që është paralajmëruar është se, në vitin 2025 do të përfundojë objekti i supermarketit ‘Lidl’ dhe siç është njoftuar tashmë publiku, në qytetin tonë do të vendosen dy objekte, apo dy supermarkete Lidl.”, tha Jordanov.

Vitin e kaluar, rrjeti gjerman i supermarketeve “Lidl” ka blerë objektin “Bricolage” në Komunën e Gazi Babës së Shkupit, i cili ishte në pronësi të “Skopski Pazar”, për 9.5 milionë euro. Gjithashtu, ideja themelore e “Lidl” në çdo vend në të cilin operon – është zhvillimi i kapaciteteve prodhuese vendore dhe rritja dhe zhvillimi i përbashkët me partnerët vendor. Prodhuesit nga Maqedonia kanë eksportuar mbi 5 milionë euro përmes rrjetit të shitjeve të “Lidl” në vitin 2024. Qarkullimi i eksporteve është rritur 25 herë krahasuar me të njëjtën periudhë të vitit të kaluar, dhe së bashku me “Lidl – Maqedoni e Veriut”, 20 kompani maqedonase kanë eksportuar në 3 vende të rajonit – Serbi, Bullgari dhe Kroaci.

Vitin e kaluar, “Lidl Maqedonia e Veriut” arriti eksporte më serioze të produkteve maqedonase në rajon, pavarësisht se ende nuk është një kompani operuese me dyqane në vend. Për herë të parë, në “Lidl” Serbi, Bullgari dhe Kroaci, organizuam disa javë tematike kushtuar produkteve tradicionale maqedonase dhe prezantimit të autenticitetit të kuzhinës maqedonase.

“Produktet plotësojnë të gjitha standardet e nevojshme për cilësi të lartë dhe ne jemi veçanërisht të kënaqur që ato priten mirë nga konsumatorët. Kjo është dëshmi e bashkëpunimit të shkëlqyer dhe partneriteteve të suksesshme që Lidl ndërton me prodhuesit dhe furnitorët vendas. Ne do të vazhdojmë këtë trend pozitiv të mbështetjes së kompanive maqedonase këtë vit, duke zgjeruar eksportet në vende të tjera”, tha Stefan Georgiev, drejtor i prokurimit të “Lidl Maqedonia e Veriut”.

Kriteret e sigurisë përmes zbatimit të detyrueshëm të standardit ndërkombëtar IFS për cilësinë dhe sigurinë e ushqimit. Në këtë mënyrë, ajvari i njohur vendor, vera e bardhë dhe e kuqe, mishi i qengjit, orizi i Koçanit, djathi i deleve, kosi i dhisë, malixhano, “lutenica”, “pastramajlija”, “slatko” dhe shumë produkte të tjera nga prodhues të çertifikuar arritën eksporte të shkëlqyera në vendet fqinje. Pas vlerësimit dhe pranimit të suksesshëm të produkteve, synohet që ato të jenë pjesë e shpërndarjes dhe asortimentit të rregullt vjetor të Lidl.

Shteti fqinj Bullgaria me një kompleks të zhvilluar industrial dhe bujqësor ka arritur që vitin e kaluar të ketë mbi 106.5 milionë leva apo 54 milionë euro, qarkullimi i realizuar nga prodhuesit bullgarë në rrjetin evropian të shitjes me pakicë të “Lidl”. Në vitin 2024, falë partneritetit të tyre me “Lidl”, gjithsej 39 kompani bullgare eksportuan produktet e tyre në 28 vende. Ndër produktet më të eksportuara në rrjetin “Lidl” për vitin 2024. Tradicionalisht ato janë buka dhe furrat, vaji, prodhimet e ndryshme të qumështit, patatinat e orizit, produktet e ndryshme të ëmbëlsirave si arra me çokollatë, simite dhe pasta etj.

/(koha.mk)