Lidhja e Diasporës së Bashkuar Kërçovare uron Pavarësinë e Kosovës

Më 17 shkurt 2008, Kuvendi i Republikës së Kosovës e shpalli Kosovën shtet të pavarur, sovran, të lirë dhe demokratik.
Pavarësinë dhe lirinë, Kosovës kurrkush nuk ia fali!
Kjo ditë erdhi pas një rrugëtimi të gjatë e të mundimshëm të gjeneratave të tëra, gjakut dhe sakrificës së tyre, të kurorëzuara me fitoren e lavdishme të Ushtrisë Çlirimtare të Kosovës mbi ushtritë dhe hordhitë okupuese serbe.

Kjo ditë erdhi gjithashtu falë mundit, sakrificës dhe gjakut të korpusit shqiptar nga të gjitha viset dhe Diasporës.
Kjo ditë erdhi edhe falë mbështetjes politike-ushtarake të Shteteve të Bashkuara të Amerikës, Unionit Evropian dhe Aleancës së lavdishme politike-ushtarake të popujve të lirë e demokratikë – Natos, për çka u jemi mirënjohës deri në amshim!
Pas fitores së madhe, aleatët tanë të jashtëm u investuan, gjithmbarshëm, në ndërtimin e shtetit të ri dhe demokratik të Kosovës.

Ata, bashkë me popullin e Kosovës, hodhën themelet e shtetit të ri, duke e përgatitur atë për shpalljen zyrtare të pavarësisë.
Hap pas hapi, aleatët tanë, ua lanë në dorë shtetin e ri elitave politike dhe intelektuale kosovare që ta mirë qeverisin, zhvillojnë, mbrojnë lirinë dhe sigurinë e të gjithë qytetarëve, tërësinë territoriale të Kosovës dhe ta bëjnë gati për anëtarësim në ata bashkime që ndihmuan shpalljen e pavarësisë së saj, në Nato dhe Unionin Evropian.

Për fatin tonë të keq, kjo mbeti një ëndërr e bukur dhe e pa realizuar edhe sot e kësaj dite!
Pushtetarët rinj me t’u rehatuar në kolltukët qeveritarë filluan të bëjnë të kundërtën e asaj për çka ishin zgjedhur dhe mandatuar nga populli i Kosovës:
Ata rehatuan shumë shpejt familjarët, shokët dhe miqtë e tyre politikë paçka se populli i tyre jetonte në skamje dhe varfëri,

Ata iu sulën ndërmarrjeve shtetërore duke i përvetësuar përmes të ashtuquajturit privatizim, duke i blerë me çmime disa herë nën vlerën e vërtetë të tyre e duke hedhur në rrugë punonjësit dhe duke e rritur papunësinë dhe varfërinë,
“Privatizuan” dhe blenë tokat më të mira, me çmime disa herë nën vlerën e vërtetë të tyre,

Vendosën monopolin në sektorët më të rëndësishëm të ekonomisë duke ngulfatur nismat, konkurrencën e lirë dhe mundësitë sipërmarrëse të forcave më të gjalla të shoqërisë duke i detyruar të kërkojnë zgjidhje jashtë Kosovës,
I falën 8000 hektarë tokë, vend me bukuri përrallore, në anën e grykës së Rugovës, Malit të Zi,

Nuk ndërtuan institucione shtetërore, të mirëfillta, të afta të drejtojnë dhe ushtrojnë sovranitetin në të gjithë territorin e Republikës,
Nënshkruan marrëveshje, me pushtetin serb, për themelimin e bashkësisë së komunave me shumicën etnike serbe, organizim ky me të drejta ekzekutive, që minon nga themeli pavarësinë e Kosovës,
Mos të harrojmë se të drejtat e pakicave serbe janë të garantuara me Kushtetutën e Republikës së Kosovës. Me rreth 2%, që përbën pakica serbe, ajo është e përfaqësuar me 10 nga 120 deputetët që ka kuvendi i Kosovës.

Ajo është e mbi përfaqësuar në të gjitha institucionet tjera, krahasuar me përqindjen e kësaj pakice.
Ua lanë, bandave kriminale serbe, sovranitetin e Veriut të Kosovës dhe ngritën skema mashtrimi dhe korrupsioni me drejtuesit e tyre. Bile nuk hezitonin të marrin pjesë në “festa” nëpër anijet e tyre luksoze bashkë me këta kriminelë.
Ishin të gatshëm t’ia falin Serbisë, pjesën më të pasur të Kosovës, Veriun e saj, për mes “marrëveshjes për ndarjen tokësore” me Serbinë,

Kur Kosova u sulmua pikërisht nga miqtë e tyre kriminelë, ata, bashkë me shumicën e medieve shqiptare, dolën kundër forcave policore të Kosovës që mbronin me sakrifica dhe patriotizëm të rrallë tërësinë tokësore të saj. Dhe, dolën, de facto, kundër pavarësisë së Kosovës.
Manipuluan zgjedhjet në disa rrathë zgjedhorë duke tronditur themelet e lirisë dhe Demokracisë,

Së bashku me mediet shqiptare iu bënë krah luftës hibride në dobi të interesave ruso-serbe dhe në dëm të pavarësisë së Kosovës,
Në zgjedhjet e fundit parlamentare në Kosovë, u vunë në anën e luftës hibride ruso-serbe bashkë me shumicën e medieve shqiptare, kundër partisë që fitoi shumicën në zgjedhje dhe i bëjnë të gjitha pengesat e mundshme dhe të imagjinueshme që t’ia pa mundësojmë formimin e Qeverisë demokratike.
Nga ajo që u tha më sipër del se korrupsioni, vjedhja e pasurisë shtetërore dhe lufta hibride vejnë në rrezik lirinë dhe pavarësinë e Kosovës.

Populli i Kosovës e pa qartë këtë dhe ndryshoi qeverisjen e kalbur në vitin 2021, të njëjtën gjë e bëri edhe votuesi në MV në vitin 2024 dhe kjo tendencë do të vazhdojë në tetor vitin 2025, ndërsa Shqipëria, urojmë dhe shpresojmë, ta bëjë në maj 2025!
Pavarësia e Kosovës nuk është dhuratë nga askush ajo mbiu nga gjaku i bijave dhe bijve më të mirë të saj.
Prandaj ajo do t’i përballojë me sukses sfidat e kohës.
Gjeneratave që shkuan, gjeneratave të sotme dhe gjeneratave që do të vijnë, urime Pavarësinë e Kosovës!

/ms