Lidhja e Diasporës së Bashkuar Kërçovare në përkrahje të Shoqatës Humanitare Cërvica – Zvicër

Lidhja e Diasporës së Bashkuar Kërçovare mbështet reagimin e Shoqatës Cërvica – Zvicër, e cila është anëtare dhe themeluese e Lidhjes e që llogaritet edhe si shtëpia e Lidhjes.

Janë absolutisht të papranueshme, për Lidhjen, ofendimet, sharjet dhe përbaltja që i bëhet Shoqatës Cërvica në zyrat e Kryetarit të Komunës së Kërçovës, ashtu si dëshmojnë audioinçizimet.

Ofendime, shantazhe dhe presione, Kryetari i Komunës së Kërçovës i ka bërë, në mënyrë të drejtpërdrejtë, si shoqatës Cërvica ashtu edhe shoqatës humanitare Kërçova – Zvicër dhe Kryetarit të saj, më 05 tetor, ditën e promovimit të kandidatëve për Kryetar Kërçove dhe programeve të tyre zgjedhore, e organizuar nga Shoqata Kërçova.

Në vend të falënderimeve për punën e mrekullueshme, shoqata Kërçova dhe Kryetari i saj, marrin sharje, ofendime dhe përbuzje, nga Kryetari i Komunës, vetëm pse nuk mund t’i kontrollojë dhe përdorë për interesat e tij, të ngushta politike.

Të kujtojmë se Shoqata humanitare Kërçova – Zvicër është themeluese dhe një nga shtyllat kryesore të Lidhjes dhe kryetari saj është edhe sekretar i Lidhjes.
Këto fyerje në adresë të këtyre dy shoqatave janë fyerje të drejtuara nga Lidhja dhe Diaspora Kërçovare.

Lidhja e Diasporës së Bashkuar Kërçovare bashkë me shoqatat themeluese do të vazhdojnë rrugëtimin e tyre, plotësisht të pavarura nga politika, të udhëhequra nga vlera morale dhe kombëtare në shërbim të interesit të bashkatdhetarëve në Diasporë dhe bashkëvendësve në Vendlindje.

Lidhja fton bashkatdhetarët të shkojnë në Vendlindje, në numër sa më të madh, dhe bashkë me bashkëvendësit të bashkohen dhe votojnë kandidatin i cili përfaqëson vlerat morale dhe kombëtare, larg interesave personale, biznesore e klanore, i cili ka program dhe vizion të punojë për Kërçovën e ëndrrave tona!

/ms