Lëvizja Qytetare “Te Berza” edhe këtë vit shpërndan kurbanë për qytetarët e Kërçovës

Edhe këtë vit, me rastin e festës së Kurban Bajramit, Lëvizja Qytetare “Te Berza” do të organizojë shpërndarjen e mishit të kurbanëve për familjet në nevojë në Kërçovë dhe rrethinë. Kjo nismë humanitare, e cila tashmë është bërë traditë, synon të sjellë ndihmë dhe gëzim në sofrat e atyre që kanë më shumë nevojë në këto ditë të shenjta.

Falë përkushtimit të anëtarëve të lëvizjes dhe bamirësisë së qytetarëve që kanë bërë nijet për kurban, kjo iniciativë po merr përmasa gjithnjë e më të mëdha. “Zoti ua shpërbleftë të gjithëve që kontribuojnë me zemër të hapur,” u shprehën përfaqësues nga lëvizja.

Shpërndarja do të bëhet në mënyrë të organizuar, duke respektuar radhën dhe nevojat e familjeve përfituese. Lëvizja “Te Berza” fton të gjithë ata që duan të kontribuojnë, të bashkëngjiten dhe të ndihmojnë në përhapjen e frymës së solidaritetit dhe humanitetit në këtë festë të rëndësishme islame.
Ky gjest është një shembull i mirë i vlerave tradicionale dhe shpirtit të bashkëpunimit në komunitet.

/tvgurra