Lëvizja BESA me struktura në gjithë Kërçovën, themelohet nëndega Zajaz – Xhuma

Lëvizja BESA ka vazhduar me “karvanin” e krijimit të strukturave në të gjitha vendbanimet e Kërçovës me rrethinë.
Dëshira, vullneti, disponimi dhe mbi të gjitha besimi në strukturat udhëheqëse të Lëvizjes BESA, dega Kërçovë, janë evidente te çdo qytetar dhe bashkëvendës, i cili është dëshpëruar nga politikat e gabuara që janë zhvilluar në dy dekadat e fundit”, thonë nga Lëvizja BESA.

Kryetare e nëndegës së Lëvizjes BESA, në Zajaz – Xhuma u zgjodh Shpresa Asani, ndërsa Lindim Veseli nënkryetar, Agron Ahmedi si sekretar, dhe Kujtim Nuredini, arkëtar.
“Më lejoni fillimisht të shpreh falënderimin tim të sinqertë për ju, kuvendarë të nderuar dhe strukturat e Lëvizjes BESA, të cilët keni punuar dhe keni kontribuar për të sjellë këtë moment të rëndësishëm.

Përkushtimi juaj dhe besimi i palëkundur janë themeli i suksesit tonë. Pas 23 viteve, ne sot shënojmë një hap të madh përpara me formimin e nëndegës sonë në Zajaz – Xhuma. Ky moment është dëshmi e përkushtimit tonë për t’u afruar më shumë me komunitetet tona dhe për të qenë të pranishëm kudo ku ka nevojë për zërin dhe mbështetjen tonë.

Kjo nëndegë nuk është thjesht një strukturë e re, por një zotim. Zotim që do të jemi dora e zgjatur për çdo individ që, ndoshta deri më tani, nuk është përfillur ose është lënë pas dore. Qëllimi ynë është të sjellim drejtësi dhe transparencë në çdo veprim tonin”, tha Shpresa Asani.
Fjalë përshëndetëse pati edhe Ministri i Politikës Sociale, Demografisë dhe Rinisë Fatmir Limani.

/ms