Lëvizja BESA – Kërçovë themeloi nëndegën e sajë në fshatin Tuhin

Lëvizja Besa, e njohur për angazhimin e saj në mbrojtjen e të drejtave të qytetarëve dhe përfaqësimin e interesave kombëtare, ka bërë një hap të rëndësishëm me krijimin e një nëndege të re në fshatin Tuhin, Kërçovë. Ky zhvillim tregon qartë synimin e Lëvizjes për të qenë më afër komunitetit dhe për të forcuar praninë e saj në çdo pjesë të vendit.

Gjatë ceremonisë së themelimit, përfaqësuesit e Lëvizjes Besa nënvizuan rëndësinë e zgjerimit të strukturave dhe e cilësuan këtë hap si një tregues të qartë të rritjes dhe mbështetjes së vazhdueshme nga qytetarët.

Me pjesëmarrje masive dhe verifikim të mandateve nga kuvendarët, pasoi propozimi i kandidatit të vetëm, për Kryetar të Nëndegës së Lëvizjes BESA, në fshatin Tuhin.

Pas aprovimit unanim të Kryetarit:
● ABDULLA AHMEDI dhe propozimit të strukturës udhëheqëse me:
● Sadik Aliu, Nënkryetar
● Beqir Mehmedi, Sekretar
● Qëndrim Sadiku, Arkëtar

… vijoi fjala përshëndetëse e Kryetarit të porsazgjedhur:
“Të nderuar bashkëfshatarë,
të respektuar përfaqësues të Lëvizjes Besa, i nderuar Ministër Fatmir Limani
Kryetarin e degës Agim Sadiku
Kryetarin e degës së Lëvizjes Besa në Austri Dashmir Ollomani.
Kryetar e komisionit për riorganizimin e nëndegëve Rexhep Emini
Kryetarin e Forumit Rinor Ramazan Dini
Zv.Drejtori i Elemit Rexhep Asani

Sot, me përulësi dhe përgjegjësi të madhe, pranoj besimin tuaj për të udhëhequr nëndegën e Lëvizjes Besa në fshatin tonë.
Ky nuk është një titull, por një detyrë dhe një angazhim për të punuar për secilin prej jush, për të dëgjuar zërin e fshatit dhe për ta kthyer atë në forcë veprimi.

Ne jemi një fshat me njerëz punëtorë, me vlera dhe tradita të forta. Por e dimë mirë që shpesh kemi qenë të anashkaluar, që shumë prej problemeve tona nuk janë dëgjuar. Kjo duhet të ndryshojë, dhe unë ju premtoj se do të jem zëri i secilit prej jush! Dhe ne do të mundohemi sidomos për të rinjtë tanë.

Të rinjtë janë e ardhmja jonë! Ata nuk duhet të detyrohen të largohen nga vendlindja për të kërkuar një jetë më të mirë diku tjetër. Ne do të angazhohemi për krijimin e mundësive që ata të kenë arsimin, punësimin dhe mbështetjen që meritojnë këtu, në shtëpinë e tyre.

Ky rrugëtim nuk bëhet nga një njeri i vetëm. Unë nuk do të jem vetëm kryetari i kësaj nëndege, por një bashkëpunëtor i juaji. Vetëm të bashkuar mund të arrijmë qëllimet tona, vetëm me punë dhe përkushtim mund ta çojmë përpara Tuhinin.
Na priftë e mbara, e mirëutakofshim.
Faleminderit!”

Fjalë përshëndetëse gjatë këtij takimi pati edhe Ministri i Politikës Sociale, Demografisë dhe Rinisë, i cili në fjalën e tij theksoi:
“Të respektuar organizues të këtij Kuvendi, i cili shënon kthesën e ndryshimit që duhet ta bëjmë bashkërisht,
Të nderuar të pranishëm dhe shumë të respektuar anëtarë e simpatizantë të Lëvizjes BESA,

Të dashur banorë të Tuhinit,
Sot jemi mbledhur që të shënojmë një moment të rëndësishëm, i cili nuk është vetëm hap organizativ, por një angazhim në drejtim të ndërtimit të të ardhmes më të denjë e të drejtë të vendit tonë.

Tuhini ndër dekada ishte vatër e lëvizjeve atdhetare dhe në kohëra të pluralizmit luajti rolin e një fryme konstruktive, të qëndrueshme dhe të përbetuar të opozitës shqiptare.

Sot, bashkërisht hapim një kapitull tjetër dhe ndryshe, duke mundësuar që Rinia të bëhet pjesë-përbërëse dhe vendimtare e politikave në rregullimin dhe ndërtimin e një sistemi, i cili do të garantojë drejtësi, siguri dhe mirëqenie në vendin tonë.

Lëvizja BESA është një betim për drejtësi dhe barazi, një forcë që përmes kyçjes së njerëzve profesionistë dhe të ndershëm do të rikëthejë shpresën e vrarë te të gjitha gjeneratat, për t’u kyçur në procesin e ndërtimit të vendit tonë.
Ky mision nuk varet vetëm nga individët që marrin përgjegjësi në këtë kuvend zgjedhor, por varet nga strukturat e ndërtuara në mbarë hapësirat.

Është momenti i fundit që duhet t’i tregojmë vendin keqbërësit, të paaftit, hajdutit, uzurpuesit dhe politikanit që u pasurua në kurriz të bujkut, blegëtorit, fshatarit, qytetarit dhe punëtorit të sinqertë.
Nuk mund të lejojmë që padrejtësia të na heshtë, që politika e vjetër të na mbajë peng. Është koha të jemi aktorë të ndryshimit, të punojmë për një shoqëri ku drejtësia dhe zhvillimi të jenë mbi dhe për të gjithë.

Le të jetë ky moment frymëzimi, për të realizuar ndryshimin e shumëpritur.
Kryetarit dhe anëtarëve të kryesisë u dëshiroj mbarësi në veprime dhe vendime të koordinuara, e të cilat do të jenë në shërbim të të mirës së përgjithshme.
Faleminderit dhe na priftë e mbara!”

Lëvizja Besa vazhdon të ofrojë mundësi për angazhim dhe zhvillim për të rinjtë, intelektualët dhe profesionistët që mbështesin parimet e barazisë, drejtësisë dhe përparimit të kombit.

Krijimi i kësaj nëndege të re është një dëshmi tjetër e angazhimit të Lëvizjes për të përfshirë çdo qytetar që synon të kontribuoni në transformimin pozitiv të shoqërisë.
#SëBashkuPërNdryshim #TuhiniMeBesën
Shkruajn nga Lëvizja BESA – Kërçovë në facebook.