Lëshohet nyja lidhëse që lidh Strugën me autostradën Ohër-Kërçovë !
Qarkullimi në rrugën Ohër—Kërçovë merr frymë lirisht nga sot, pasi krahu lidhës në Podmol është zyrtarisht i hapur për përdorim të rregullt. SPB Ohër njofton se me funksionalizimin e kësaj nyje, trafiku është normalizuar plotësisht në drejtimet kryesore që lidhin Ohrin, Strugën, Kërçovën dhe Shkupin.
Segmenti tashmë është në funksion pa asnjë kufizim shtesë, duke lehtësuar ndjeshëm lëvizjen e automjeteve në këtë nyje të rëndësishme rrugore. Autoritetet u bëjnë thirrje të gjithë shoferëve që të respektojnë rregullat e qarkullimit dhe sinjalistikën horizontale e vertikale përgjatë tërë autostradës, me qëllim rritjen e sigurisë dhe shmangien e incidenteve në terren.
SPB Ohër apelon se kjo fazë e normalizimit kërkon kujdes të shtuar nga drejtuesit e automjeteve, ndërsa sinjalistika e vendosur duhet respektuar rigorozisht.
/ms
