LAJM I MIRE: Zbulohet ilaçi kundër kancerit, ‘dyfishon mbijetesën e pacientit’..!?

Një përparim i jashtëzakonshëm në mjekësinë onkologjike është bërë publik së fundmi, duke ofruar shpresë të madhe për mijëra pacientë në mbarë botën. Një ilaç i ri imunoterapie, i quajtur pembrolizumab, ka arritur të dyfishojë kohën e mbijetesës së pacientëve me kancer në kokë dhe qafë pa rikthimin e sëmundjes, një arritje që po cilësohet si më e madhja në dy dekadat e fundit në këtë fushë.

Sipas BBC, studimi klinik është zhvilluar në 192 spitale në 24 vende dhe është drejtuar nga Universiteti i Uashingtonit në SHBA, me mbështetjen e kompanisë farmaceutike MSD.

Rezultatet e këtij studimi do të prezantohen në Kongresin vjetor të Shoqatës Amerikane për Onkologjinë Klinike (ASCO), një nga ngjarjet më të rëndësishme shkencore në fushën e kancerit.

Kjo terapi funksionon duke aktivizuar sistemin imunitar të pacientit që të njohë dhe të luftojë qelizat kancerogjene. Strategjia përfshin administrimin e ilaçit para dhe pas ndërhyrjes kirurgjikale, duke e ndihmuar trupin të ‘shohë’ tumorin dhe të zhvillojë një reagim të fortë ndaj tij edhe pas heqjes fizike.

“Ky trajtim mund të ndryshojë rrënjësisht mënyrën se si e trajtojmë kancerin në kokë dhe qafë,”, tha profesor Kevin Harrington, udhëheqës i studimit në Mbretërinë e Bashkuar. “Ai zvogëlon ndjeshëm mundësinë që sëmundja të përhapet në pjesë të tjera të trupit, duke i dhënë pacientëve një shans real për të jetuar më gjatë dhe më mirë.”

Një nga pacientët që mori pjesë në studim është Laura Marston, 45 vjeç, nga Derbyshire, Angli. Në vitin 2019, ajo u diagnostikua me kancer të avancuar në kokë dhe qafë dhe mjekët i dhanë vetëm 30% shanse për të mbijetuar pesë vitet e ardhshme. Gjashtë vjet më vonë, ajo është në gjendje të mirë shëndetësore dhe punon me kohë të plotë.

“Jam e habitur që jam ende gjallë,”, rrëfen Laura. “Kjo terapi më ka rikthyer jetën. Nuk besoja se do të isha këtu për të treguar historinë time.”

Laura humbi një pjesë të rëndësishme të gjuhës gjatë operacionit, por falë një ndërhyrjeje rindërtuese, ajo rifitoi aftësinë për të folur dhe ngrënë. Për të, imunoterapia ishte një përvojë ‘fenomenale’ që i ndryshoi jetën.

Sipas të dhënave nga studimi:
1.Pacientët që morën pembrolizumab para dhe pas operacionit jetuan mesatarisht pesë vjet pa rikthim të kancerit, krahasuar me 2.5 vjet tek ata që morën trajtimin standard.

2.Rreziku i përhapjes së sëmundjes në pjesë të tjera të trupit u ul me 10% pas tre vitesh.
Këto rezultate janë veçanërisht domethënëse duke pasur parasysh faktin që çdo vit diagnostikohen mbi 12,800 raste të reja me këtë lloj kanceri vetëm në Mbretërinë e Bashkuar.

Ekspertët e shohin këtë si një moment kthese në trajtimin e kancerit të kokës dhe qafës, një nga format më të vështira për t’u trajtuar për shkak të pozicionit dhe natyrës agresive të sëmundjes. Ndërsa rezultatet janë ende të hershme dhe do të nevojitet monitorim i mëtejshëm afatgjatë, përfitimet e deritanishme janë mëse premtuese.

“Ky është një hap gjigant drejt personalizimit të trajtimit të kancerit dhe forcimit të rolit të sistemit imunitar në luftën kundër sëmundjeve të rënda,”, përfundon profesori Harrington.

/syri