Kush po i fryn destabilizimit..!?

Tensionet ndëretnike, mundësia e destabilizimit dhe qasja e institucioneve ndaj incidenteve të ndodhura gjatë javës së kaluar. Këto tema vazhdojnë të dominojë diskursin publik në Maqedoninë e Veriut, ku partitë politike të pushtetit dhe opozitës akuzojnë njëra tjetrën për skenarë të errëta të destabilizimit.

Ministri i Punëve të Brendshme, Pançe Toshkovki bëri thirrje qytetarëve për sjellje të përgjegjshme. Situata me incidentet e ndodhura gjatë javës së fundit i sheh si të izoluara, por të cilat duhet të përcillen me shqetësim të posaçëm. Ai tha se ndaj rasteve në fjalë policia shtetërore për herë të parë ka pasur një reagim efikas, të shpejtë dhe të gjithëpërfshirshëm.

“Në lidhje me ngjarjet deri tani janë arrestuar 18 persona, prej tyre 4 janë në paraburgim. Për rreth dhjetëra të tjerë është inicuar padi penale për shkak. Në mënyrë adekuate, me kohë dhe me përgjegjësi kemi intervenuar si MPB dhe hulumtojmë për motivin e ngjarjeve. Ashtu që në këtë moment do të kisha theksuar se me vendosmëri, në mënyrë të barabartë kemi intervenuar ndaj të gjithëve”, ka deklaruar minsitri.

Nga ana tjetër, nga BDI theksojnë se gjashtë ditë pas incidenteve ende nuk ka masë konkrete për policin, i cili largoi flamurin shqiptar nga shtylla në Kumanovë dhe e hodhi atë në tokë. Nga BDI thonë se edhe përkundër paralajmërimeve për sanksionimin të njëjtit, ende nuk ka njoftim zyrtar se çfarë masa janë marrë ndaj të njëjtit.

“Sot shënohet dita e gjashtë që ky zyrtar policie vazhdon të jetë i lirë, pa asnjë masë disiplinore, pa asnjë ndëshkim për veprimin e tij të turpshëm. Çfarë mesazhi po jepet me këtë? A po dërgohet sinjali se ofendimi i shqiptarëve, sulmi ndaj simboleve tona dhe përçmimi ndaj komunitetit tonë janë të tolerueshme dhe të pandëshkueshme? Kjo heshtje e institucioneve, kjo mungesë e drejtësisë, është një fyerje e dyfishtë për shqiptarët. Është një mesazh i rrezikshëm që legalizon diskriminimin dhe thellon ndarjet në një shoqëri që pretendon të jetë demokratike dhe e barabartë për të gjithë qytetarët”, thonë nga BDI, të cilët në kuadër të Frontit Europian kanë inicuar interpelancë ndaj katër ministrave, përkatësisht ministrit Pançe Toshkovski, zëvendësit të tij Astrit Iseni dhe dy zv/kryeministrave Izet Mexhiti dhe Ivan Stoilkoviç.

Duke komentuar këtë veprim të opozitës shqiptare, ministri i punëve të brendshme Toshkovski, të njejtin e cilësoi si jo-serioze dhe si tentim të BDI-së për të manipuluar dhe shpërqëndruar vëmendjen e opinionit.

TOSHKOVSKI: INTERPELANCA E BDI-SË, PËRPJEKJE E ULËT PËR MANIPULIM
” Tezat që janë hedhur në periudhën e kaluar nga opozita, veçanërisht nga BDI, janë vërtet kontradiktore në vetvete. Qytetari maqedonas, populli maqedonas e di shumë mirë se çfarë qëndron pas kësaj interpelance sa i përket kërkesës së tyre. U dëshiroj fat. Kuvendi do të veprojë në drejtim të asaj që mendon. Sinqerisht mendoj se kjo është një përpjekje e ulët për të manipuluar publikun”, u shpreh ministri i punëve të brendshme Pançe Toshkovski

Ndaj interpelancës së BDI-së nga VLEN përmes një komunikate thonë se BDI-ja është sinonim i destabilizimit. Nga koalicioni në pushtet, duke komentuar ngjarjet e fundit, thonë se Fronti Evropian po tenton të mbjellë frikë te qytetarët.

“I ashtuquajturi Fronti Evropian i cili tani po hedh shqelmat e fundit po tenton të mbjell pasiguri te qytetarët. Fakti që u destabilizua Fronti i thirrur në “Evropian”, nuk nënkupton se duhet të destabilizohet shteti. Fakti që ata janë bërë pikë e pesë, nuk do të thotë se edhe shoqëria të bëhen si ata.Tentimet për destabilizim nuk do të kalojnë, harmonia e bashkëjetesa mes qytetarëve do ngadhënjej ku të gjithë do të ndjehen të barabartë. Këtë e kemi dhënë si zotim gjatë fushatës zgjedhore dhe për këtë po angazhohemi çdo ditë me përkushtim.”, thuhet në komunikatën e koalicionit VLEN.

PËRPLASEN ISH-PARNTERËT E KOALICIONIT QEVERITAR – BDI DHE LSDM
Ndërkohë BDI kanë pasur kritika edhe për retorikën e përdorur nga kryetari i LSDM-së, Venko Filipçe, i cili tha se partia e Ali Ahmetit e ka keqpërdorur mbështetjen e LSDM-së në qeverinë e kaluar. Nga BDI thonë se “deklaratat e fundit të Venko Filipçes, tregojnë një rrëshqitje të rrezikshme drejt qasjeve të njohura të VMRO-DPMNE-së”. Megjithatë social-demokratët theksojnë se faktor stabiliteti në vend është pikërisht LSDM, ndërsa si zgjidhje për qetësim të situatës së krijuar e shohin te mbajtja e takimit të liderëve, që sipas LSDM-së do të kishte kontribuar në zbutjen e tensioneve dhe në ruajtjen e stabilitetit të vendit.

“LSDM ka qenë faktor stabiliteti në Maqedoni që nga pavarësia e saj dhe garantues i marrëdhënieve të qëndrueshme ndëretnike. Të gjitha ngjarjet fatkeqe historike në këtë drejtim u tejkaluan me sjelljen politike burrështetërore të LSDM-së. Prisnim që BDI do të ishte e para që do ta pranonte takimin e lidershipit për stabilitet të ofruar nga presidenti Filipçe. Fatkeqësisht, një gjë e tillë nuk ndodhi dhe BDI-ja humbi një mundësi, ashtu si VMRO-DPMNE-ja, për të treguar se me të vërtetë qëndron për paqen dhe stabilitetin në vend”, theksojnë nga Lidhja Social Demokrate e Maqedonisë.

Përndryshe, tensionet ndëretnike u ngritën gjatë shënimit të 28 nëntorit, ku disa adoleshentë shqiptarë përdhosin flamurin maqedonas, gjë që pasoi me reaksion nga pala maqedonase, ku disa grupe të të rinjëve dogjën flamujt kombëtar shqiptarë, ndërsa u shpërndanë edhe pamje në të cilin shihej një zyrtar policie në Kumanovë, i cili heq nga shtylla flamurin kombëtarë shqiptarë dhe e hedh atë përtokë.

/(koha.mk)