Kujdes gjatë blerjes dhe ruajtjes së ushqimit për shkak të rrezikut nga helmimi..!?

Pas njoftimit të Ministrisë së Shëndetësisë se temperaturat ditore do të arrijnë mbi 40 gradë Celsius në pjesë të caktuara të vendit, Agjencia e Ushqimit dhe Veterinarisë (AUV) u bën thirrje qytetarëve që të bëjnë zgjedhjen e duhur gjatë blerjes, transportimit dhe ruajtjes së ushqimit që konsumojnë, në mënyrë që të shmangen helmimet e mundshme, transmeton Portalb.mk.

“Është e nevojshme të bëhet zgjedhja e duhur e ushqimit dhe blerja e tij, të sigurohen kushtet e duhura të transportit dhe ruajtjes. Të merret parasysh pamja, data e skadimit dhe ruajtja e duhur e ushqimit, të blihen ushqime nga vende të verifikuara ku ka kushte të përshtatshme ruajtjeje dhe ku produktet, veçanërisht ato që prishen me origjinë shtazore, ruhen në njësi frigoriferike”, njoftoi Agjencia.

AUV rekomandon që qytetarët të shmangin blerjen dhe konsumimin e ushqimit me paketim të dëmtuar, pra paketim që është i shtypur, i fryrë ose i çarë, të blejnë produkte të ftohta ose të ngrira në fund të blerjes dhe të mos ruajnë ushqime që prishen për një kohë të gjatë në makina dhe mjete të tjera transporti në temperatura të papërshtatshme. Gjithashtu rekomandohet të shmanget blerja e ushqimit të ftohtë ose të ngrirë që prishet dhe ruhet jashtë frigoriferit ose ngrirjes.

“Ushqimi i ngrirë duhet të ruhet në një temperaturë më të ulët se 5 gradë Celsius, dhe ushqimi që duhet të gatuhet duhet të përpunohet në temperaturë më të lartë se 60 gradë Celsius. Frutat dhe perimet duhet të lahen plotësisht nën ujë të rrjedhshëm para konsumimit, dhe mishi, qumështi dhe vezët duhet të përpunohen siç duhet. Kafshët shtëpiake dhe kafshët e tjera duhet të mbahen larg ushqimit që po përgatitet”, shtoi AUV.

Lidhur me konsumin e ushqimit në hotelieri, AUV paralajmëron qytetarët të zgjedhin lokale që kujdesen për higjienën dhe sigurinë e ushqimit dhe kanë reputacion të mirë. Në lokalet e ushqimit të shpejtë, nga ana tjetër, rekomandohet të shmangen aditivët që nuk mbahen në frigorifer, siç janë majoneza, keçapi, sallatat me krem, salcat.

Ata shtojnë se rritja e temperaturave përfaqëson gjithashtu një stres të madh për bagëtinë, i cili mund të manifestohet në uljen e marrjes së ushqimit, rritjen e nevojës për ujë, uljen e prodhimit të qumështit dhe rritjen e dobët. Lagështia e lartë dhe ventilimi i pamjaftueshëm në objektet ku ato qëndrojnë mund të shkaktojnë goditje nga nxehtësia tek kafshët, dhe goditje nga dielli që hfaqet si rezultat i ekspozimit të drejtpërdrejtë në diell. Në të dyja rastet, siç u tha, rezultati mund të jetë fatal nëse nuk merren masa në kohë.

Kujtojm se për shkak të njoftimit nga Drejtoria për Punë Hidrometeorologjike (DPH) për temperatura maksimale ditore më të larta nga 24 deri më 27 qershor, Instituti i Shëndetit Publik bën thirrje për respektimin e masave të mbrojtjes së shëndetit për popullatën e përgjithshme dhe grupet e cenueshme të popullsisë në kushte të temperaturave të larta të ambientit. Prandaj, ata kanë lëshuar rekomandime për punëdhënësit dhe punëtorët në kushte të temperaturave të rritura.

/portalb