Kryqi i Kuq raporton se rreth 230 personava jan evakuuar në Kërçovë

Përmbytjet që përfshinë sërish rajonin e Kërçovës shkaktuan dëme serioze dhe rritën shqetësimin tek popullata. Pas reshjeve të dendura të shiut dhe daljes së lumenjve nga shtrati, shumë familje po përballen me shtëpi të përmbytura, dëmtime të pronës dhe vështirësi në lëvizje.

Gjatë natës, për shkak të rritjes së nivelit të ujit, lumi Zajaska doli nga shtrati në rrugën “Prilepska” në Kërçovë, duke përfshirë disa shtëpi. U realizua menjëherë evakuimi i rreth 230 personave, të cilët janë strehuar përkohësisht në sallën sportive “Hristo Uzunov”. Gjithashtu, është regjistruar grumbullim uji në rrugën “29 Nëntori” në lagjen Podvarosh, ku janë përmbytur hapësira bodrumesh në disa objekte, si dhe një pjesë e objekteve të spitalit në Kërçovë.

ryqi i Kuq doli menjëherë në terren dhe po vepron në koordinim me institucionet përkatëse. Ekipet e vullnetarëve dhe punonjësve janë angazhuar në mbështetje të popullatës së prekur, duke siguruar dyshekë, shtretër, batanije, ushqim dhe vakte të ngrohta, ujë të pijshëm si dhe mjete për ruajtjen e higjienës personale dhe kolektive. Paralelisht, po ofrohet edhe mbështetje psikosociale për familjet e evakuuara.

Përveç Kërçovës, përmbytje janë raportuar edhe në pjesë të tjera të vendit. Në fshatin Idrizovë (Komuna Gazi Babë), fshatin Bukoviq (Komuna Saraj), fshatin Zelenikovë (Komuna Zelenikovë) dhe lagjen Radishan (Komuna Butel) janë regjistruar oborre dhe hapësira bodrumesh të përmbytura.

Në rajonin e Tetovës është raportuar një rrëshqitje dheu në aksin rrugor Tetovë – fshati Xhermë, për shkak të së cilës qarkullimi është ndërprerë. Në Gostivar dhe zonat përreth janë përmbytur disa shtëpi në fshatin Bellovishtë, si dhe në lagjet Cigllanë dhe Banjecë. Në fshatin Balindoll është raportuar një kanal i bllokuar, që ka shkaktuar përmbytjen e disa shtëpive. Në një nga shtëpitë e përmbytura në Bellovishtë kanë mbetur të bllokuar dy fëmijë dhe nëna e tyre, pas së cilës kanë ndërhyrë shërbimet kompetente.

Kryqi i Kuq mbetet në terren për aq kohë sa ka nevojë për ndihmë, duke apeluar tek qytetarët, institucionet dhe kompanitë për solidaritet dhe mbështetje në këto momente të vështira. Humanizmi dhe bashkëpunimi janë thelbësore për tejkalimin e pasojave të kësaj fatkeqësie natyrore.

/ms