Kryetari i Komunës së Kërçovës viziton Gjimnazin “Drita”

Kryetari i Komunës së Kërçovës, z. Aleksandar Jovanovski, sot vizitoi Gjimnazin “Drita”, ku u prit nga drejtoresha Syarta Spahiu dhe zëvendësdrejtoresha Zana Rrahmani.
Gjatë takimit u diskutua për përgatitjet për fillimin e vitit të ri shkollor, si dhe për bashkëpunimin ndërmjet Komunës dhe gjimnazit, me qëllim përmirësimin e kushteve dhe mbarëvajtjen e procesit edukativo-arsimor.

Një nga çështjet e diskutuara ishte edhe mundësia e zhbllokimit të llogarisë së shkollës, përmes bashkëpunimit me komunën dhe ndërmarrjes së hapave të nevojshëm për tejkalimin e vështirësive financiare.

Gjatë takimit u bë e ditur se edhe këtë vit në vitin e parë të Gjimnazit “Drita” do të funksionojnë 8 paralele – 4 gjimnaz dhe 4 profesionale, duke ruajtur numrin e paraleleve si deri tani.
Drejtoresha Syarta Spahiu theksoi se gjithçka është gati për fillimin e vitit të ri shkollor.

Ajo bëri të ditur se në shkollë janë realizuar edhe disa rinovime në hapësirat e stafit arsimor, falë angazhimit të saj dhe mbështetjes së donatorëve të ndryshëm, me qëllim krijimin e kushteve më të mira për mësimdhënësit dhe mbarëvajtjen e procesit arsimor.
Takimi u zhvillua në frymën e bashkëpunimit dhe me synim që viti i ri shkollor të nisë në mënyrë sa më të mirë për nxënësit, mësimdhënësit dhe stafin e Gjimnazit “Drita”.

/tvgurra