Krimi i organizuar shqiptar në hartën Europiane
“Grupet kriminale shqiptare”, dikur të konsideruara periferike në strukturat kriminale të Europës, sot përshkruhen në dokumentet zyrtare si aktorë me rol të rëndësishëm në tregjet ilegale ndërkombëtare. Raportet e institucioneve europiane të sigurisë evidentojnë praninë e tyre në rrjetet transnacionale të krimit të organizuar, veçanërisht në trafikun e drogës dhe aktivitetet financiare të paligjshme.
Edhe raporti vjetor i SPAK thekson se trafiku i narkotikëve, sidomos i kokainës, mbetet aktiviteti kryesor i grupeve të lidhura me shtetas shqiptarë. Këto rrjete operojnë përmes zinxhirëve kompleksë furnizimi që nisin nga Amerika Latine dhe përfundojnë në tregjet e Bashkimit Europian, duke përdorur komunikime të enkriptuara, kompani fiktive dhe kriptovaluta.
Ambasadori i BE-së në Shqipëri, Silvio Gonzato, paralajmëron se krimi i organizuar minon ekonominë, administratën publike dhe besimin e qytetarëve, duke përbërë një pengesë serioze për integrimin europian të vendit.
Raporti italian “Relazione Annuale 2025” konfirmon se grupet kriminale shqiptare janë të pranishme gjerësisht në Itali dhe karakterizohen nga specializim i lartë në trafikun e drogës. Ato bashkëpunojnë me organizata të tjera kriminale dhe kanë krijuar lidhje të drejtpërdrejta me rrjetet në Amerikën Latine për furnizimin me kokainë.
Përveç trafikut të drogës, këto grupe përfshihen edhe në pastrim parash, trafik armësh dhe qeniesh njerëzore, duke përdorur skema financiare të sofistikuara, kompani fiktive dhe teknologji digjitale për të fshehur aktivitetet.
Ekspertët theksojnë se ndërsa rrjetet kriminale janë përshtatur shpejt me zhvillimet teknologjike dhe bashkëpunimin ndërkombëtar, institucionet shqiptare vazhdojnë të përballen me korrupsion, burokraci dhe mungesë burimesh njerëzore të specializuara.
Megjithatë, zhvillimet e fundit tregojnë disa shenja përmirësimi, përfshirë rritjen e operacioneve të përbashkëta dhe forcimin e strukturave të specializuara. Sipas ekspertëve, vetëm përmes një transformimi institucional dhe forcimit të bashkëpunimit ndërinstitucional Shqipëria mund të ndërtojë një sistem sigurie më efektiv për të përballuar krimin e organizuar transnacional.
/ts
