Krimi 150 milionë euro ! Goditet gjiganti “Pucko Petrol”..!?
Ministria e Brendshme e Maqedonisë së Veriut njoftoi dje për një aksion të gjerë bashkë me Prokurorinë për dyshime për importin e mazutit të dëmshëm përmes kontratave fiktive, jozyrtarisht, në vlerë të 10 miliardë denarëve apo mbi 150 milionë euro, përcjell INA.
Informacionet e para thonë se bëhet fjalë për një rrjet të importuesve, të cilët dyshohen se në mënyrë ilegale kanë shpërndarë derivate me origjinë dhe cilësi të dyshimtë.
Rrjeti apo personat e dyshuar për këtë rast janë biznesmeni Ratko Kapushevski, që njihet si pronar i kompanisë “RKM Energji” si dhe biznesmeni tjetër “Asmir Jaoski” pronari i kompanisë gjigante të naftës “Pucko Petrol”, që njëherit është edhe djali i deputetit të BDI-së, Ismail Jaoski.
Në rrjetin e të dyshuarëve janë edhe emra të tjerë. Sipas portalit mkd.mk në mesin e të dysharëve janë edhe ish-drejtorat e ESM, Vasko Kovaçevski, Adrijan Muça, Erxhan Sulkovski, që sipas këtij portal thuhet se është partner i Kushtrim Smajlaj, dhëndërit të Ali Ahmetit.
I dyshuar është edhe A.Muça, ndërsa po merren në pyetje edhe Nikolla Stojanovski, Emill Pecakov, Marija Neshovska, Bllagica Markoviç, Ruxhdi Ramadani, Dushica Seijovska Jovanoviç, Dobrilla Stefanovska, Erxhan Sulkoski dhe Danqo Stojanovski.
Përndryshe, furnizimi me këtë lloj të mazutit dyshohet se është bërë për nevojat e Termoelektranës “Negotinë”, por gjithashtu ka dyshime për keqpërdorime të tenderëve të tjerë në rrjetin e Elektranave të Maqedonisë së Veriut.
Kujtojmë se këto lëndë djegëse shpesh përmbajnë nivele të larta të sulfurit, metaleve të rënda ose përbërësve të tjerë të dëmshëm, që mund të çojnë në ndotje serioze të ajrit dhe tokës.
Kapushevski dhe Jaoski si dhe të tjerët e grupit të përfshirë në këtë rast pritet që sot të dalin para Gjykatës Penale. Gjatë natës së mbrëmshme dhe sot në mëngjes janë kryer bastisje dhe kontrolle nëpër ambientet private dhe zyrtare të të dyshuarëve të këtij rrjeti. Prokuroria pritet që sot të jap detaje më të hollësishme për këtë krim dhe kontrabandë të organizuar.
/(INA)
