Kreshnik Bekteshit dhe 12 personave të tjerë u është caktuar paraburgim 30 ditor për zjarrin në Koçan..!?

Gjykata Themelore e Koçanit ka pranuar propozimin e Prokurorisë për 13 prej të dyshuarve dhe u ka shqiptuar masën e paraburgimit prej 30 ditësh, Në mesin e tyre është edhe ish-ministri i Ekonomisë Kreshnik Bekteshi, raporton SHENJA.

“Ndaj 13 personave është marrë vendim dhe është caktuar masa e paraburgimit prej 30 ditësh”, ka thënë Gjykata e Koçanit.
Për gjashtë të dyshuarit e tjerë, lidhur me masën e paraburgimit të kërkuar, siç shtojnë ata, sot do të merret vendim.

Për shkak të respektimit të prezumimit të pafajësisë, Gjykata Themelore në Koçan nuk po bën me dije identitetin e të dyshuarve për të cilët është hapur hetim dhe të cilëve u është caktuar masa e paraburgimit.

Ndryshe, bëhet fjalë për 19 persona të cilëve me kërkesë të Prokurorisë, paraprakisht dy herë u është caktuar masa e paraburgimit afatshkurtër prej 48 orësh gjatë procedurës paraprake, me qëllim që organet hetimore të mund të mbledhin provat e nevojshme për fillimin e hetimeve.

Prokuroria Publike e Republikës së Maqedonisë së Veriut njoftoi se Prokuroria Themelore Publike në Koçan gjatë natës ka lëshuar urdhër për zhvillimin e procedurës hetimore ndaj 27 personave fizik dhe tre personave juridikë në lidhje me zjarrin katastrofik në Koçan.

Ata thonë se sot në ora 12:00 në një konferencë për media para ndërtesës së Prokurorisë Themelore Publike të Koçanit do të bëhen të ditura detaje për hetimin, të dyshuarit dhe masat e propozuara të sigurisë.

Në mesin e të dyshuarve, siç dihet tashmë në opinion, janë edhe ish-ministri i Ekonomisë Kreshnik Bekteshi, ish-sekretarja shtetërore në këtë Ministri, Razmena Cekiq-Duroviq, si dhe udhëheqësi në Ministrinë e Ekonomisë Bekim Haxhiu..

/shenja