“Kosova si Kandahar” dhe rasti Sheholli – Myftiu Naim Tërnava me deklaratë publike

Prokuroria Speciale e Kosovës ka ngritur aktakuzë ndaj Fatmir Shehollit për spiunazh dhe shantazh. Sipas aktakuzës, në telefonin e tij është gjetur një fotografi e titulluar “Top Secret 2”, e përfshirë si provë në këtë rast.

Dokumenti, të cilin Sheholli dyshohet se ia kishte dërguar një personi, përmbante pretendime për një plan që synonte zgjerimin e ndikimit të radikalizimit islamik në Kosovë dhe rajon.

Pas publikimit të këtyre pretendimeve, myftiu i Kosovës, Naim Tërnava, reagoi publikisht duke kërkuar që dokumenti “Top Secret” të verifikohet plotësisht nga institucionet kompetente.

Tërnava theksoi se pretendimet se Bashkësia Islame e Kosovës ishte nën ndikimin e shërbimeve serbe dhe se xhamitë e medresetë financoheshin nga Serbia janë jashtëzakonisht të rënda dhe nuk duhet të trajtohen si të vërteta pa prova.

Ai kërkoi të zbardhet autorësia, origjina, autenticiteti dhe qëllimi i dokumentit, si dhe të sqarohet nëse ai është përdorur ndër vite për të ngritur akuza apo për të dëmtuar imazhin e Bashkësisë Islame të Kosovës.

“Le të ndahen faktet nga pretendimet dhe le të mbajë përgjegjësi secili për veprimet e veta. Ajo që kërkojmë është e thjeshtë: e vërteta të dalë në dritë dhe drejtësia të bëjë punën e saj”, deklaroi Tërnava.

/infoshqip