Konflikti VP nga Agron Vrangalla

Kam kohë që e them se në kuadër të periudhës së pandemisë do të vijë dita kur njerëzit do të ndahen kryesisht në dy grupe kryesore: në të Vaksinuar dhe të Pavaksinuar.
Nuk flas nga pikëpamja mjekësore, por nga pikëpamja sociologjike.
Për arsye thjeshtësimi, grupin e vaksinuar do ta emërtojmë me shkronjën V, ndërsa grupin e pavaksinuar me shkronjën P.

Njerëzit do të fillojnë të urrejnë njëri-tjetrin vetëm për shkak të vaksinave. V-të nuk do t’i duan pranë P-të me pretekstin se po jua rrezikojnë jetën. Ndërsa P-ja, do të mendojë se pikërisht këta V-të janë më të rrezikuar ndaj covidit por edhe ndaj sëmundjeve të tjera shumë më të rënda.

V palën tjetër e sheh si injorante, si palë që nuk i beson shkencës, por merret me llafe që bëhen në kafe. Gjithashtu P palën tjetër e sheh si injorante që nuk di të mendojë e logjikojë por se ndjek vetëm atë çfarë thonë institucionet përkatëse.
Teksa V-të mendojnë se pala tjetër nuk i beson shkencës, P-të gjithashtu mendojnë se të vaksinuarit i besojnë vetëm shkencës zyrtare apo institucionale e jo shkencës së lirë, asaj që nuk ka interesa politike apo ekonomike.

V mendon se shkenca është vetëm ajo zyrtarja (OBSH & co), ndërsa P mendon se shkenca zyrtare është e kapur nga forcat e koncentruara dhe se nuk e thotë të vërtetën e plotë.
V mendon se tashmë janë thënë të gjitha për sa i përket vaksinave dhe se ato janë të sigurta 100%. P mendon se është shumë herët të bëhet një konstatim për efikasitetin e vaksinave sepse studimet ende nuk kanë përfunduar.

V mendon se vaksina të mbron me çdo kusht. P mendon se vaksina nuk të mbron dhe se mund të riinfektohesh sërish.
Në mes këtyre dy grupeve do të krijohet një hendek i thellë.
Konfliktet në qëndrime do të nisin që nga familjet e ngushta e deri tek shokët dhe miqtë, për të përfunduar në një debat më të gjerë social.

Në shikim të parë, V perceptohet si e përgjegjshme, P si e papërgjegjshme.
V është në numër më të vogël se sa P (shikoni statistikat)
V e duan të gjitha qeveritë sepse është e dëgjueshme, P nuk e do asnjë qeveri sepse është rrebele.

Që të dy grupet kanë nga pak të drejtë dhe nga pak gabime.
Por kush e pëson në fund?
Të gjithë!