Koçani, reagime nga LSDM dhe BDI..!?

Nuk ndalen reagimet e partive pasi Prokuroria njoftoi për zgjerimin e hetimit për tragjedinë në Koçan me 19 persona të tjerë. Sipas BDI-së, ushtrohet sulm institucional ndaj shqiptarëve në vend. Nga kjo parti njoftuan se kryeprokurori Lupço Kocevski është nën presion politik për shkarkim nga ana e kryeministrit dhe se hetimi është selektiv.

“BDI u bën thirrje profesionistëve në Ministrinë e Punëve të Brendshme dhe në Prokurorinë Publike që të mos lejojnë të bëhen pjesë e kësaj tregtie me ndikim dhe përmes kësaj të mos e legjitimojnë këtë pazar politik… Ajo që po na shfaqet nuk është drejtësi – por një agresion institucional i njëanshëm ndaj popullit shqiptar në këtë vend”, thotë BDI.

Nga LSDM mendojnë se hetimi, në vend që të sjellë drejtësi, u shndërrua në farsë. Sipas socialdemokratëve, hetimi është rast klasik i mbrojtjes politike, ndërsa ministri Pançe Toshkovski i mbron kuadrot e tij.

“Edhe pas zgjerimit të hetimit, një gjë është e qartë: nuk kërkohet asnjë përgjegjësi nga ata që atë natë të kobshme ishin në funksion në MPB, por edhe institucione të tjera të cilat kishin për obligim që ta parandalojnë ngjarjen… Kjo është drejtësi selektive e VMRO-DPMNE ku Toshkovski i mbron ata që i ka emëruar në funksione”, thotë LSDM.

U përgjigjën nga VMRO-DPMNE. E porositën LSDM-në që të informohet.
“Nuk do të tregojmë detaje, për shkak se institucionet kompetente njoftojnë në bazë ditore për atë që nuk do të ndikojë në hetim. LSD tani mund vetëm të dëgjojnë përkatësisht të informohen për hetimin, së pari për atë që e kanë lëshuar dhe pastaj edhe për atë që është duke ndodhur”, thotë VMRO-DPMNE.

Ministri i brendshëm Pançe Toshkovski paraprakisht tha se hetimi nuk guxon të politizohet ndërsa kryeprokurori Lupço Kocevski tha se Prokuroria po punon sipas ligjeve dhe garanton se nuk do të ketë selektivitet.

/tv21