Kjo është padia e pestë për ish-kryetarin e komunës Fatmir Dehari

“Kallëzim penal kundër F.D. (52) nga fshati Sërbicë i Kërçovës, për shkak të ekzistimit të bazave të dyshimit për kryerje të veprës penale “keqpërdorimi i detyrës dhe autorizimit zyrtar”, kundër B.K. (46) nga fshati Arangjel i Kërçovës për shkak të ekzistimit të bazave të dyshimit për kryerje të veprës penale “punë e pandërgjegjshme në detyrë”, kundër D.S. (41) nga fshati Dllapkin Dol i Kërçovës për kryerje të veprës penale “keqpërdorimi i procedurës për thirrje publike, dhënia e kontratës së prokurimit publik ose partneritetit publik-privat”, si dhe kundër një personi juridik me seli në Dllapkin Doll”, raporton Policia.

Policia vlerësoi se dëmi i shkaktuar është 1 457 205 denarë, mjete që dyshohet se u keqpërdorën gjatë mirëmbajtjes së gjelbërimit rreth objektit të komunës. Ish-kryetari Dehari më 8 janar të vitit të kaluar e kishte ngarkuar një subjekt juridik për këtë punë, edhe pse kishte ndërmarrje publike komunale për këtë qëllim.
Ky është kallëzimi i pestë penal kundër Fatmir Deharit si kryetar komune në më pak se një vit.

Më 29 janar 2026, MPB ngriti kallëzim penal kundër Deharit për keqpërdorim të detyrës dhe larje parash, me çka e ka dëmtuar buxhetin e komunës 130 mijë euro.
Më 4 maj 2025 MPB ngriti kallëzim penal kundër Deharit për keqpërdorim të pozitës zyrtare duke dëmtuar buxhetin komunal me 4 milionë denarë.
Më 29 korrik 2025 MPB ngriti kallëzim ndaj Deharit pasi lejoi ngritjen e një deponie mbeturinash të paligjshme.
Më 25 nëntor 2025 MPB ngriti kallëzim ndaj Deharit për kryerjen e veprës penale “punë e pandërgjegjshme në detyrë”.

Kujtojmë se Dehari ri-kandidoi për kryetar të komunës së Kërçovës në zgjedhjet lokale 2025, por humbi nga kandidati i VMRO-së. Gjatë fushatës zgjedhore, ai u përmend në skandalin me materiale të përgjuara ku dëgjohet një zë i cili thuhet të jetë Dehari, të cilat janë me përmbajtje eksplicite, seksuale, korruptive, ofendime, sharje dhe të tjera.

/portalb