Khamenei: Izraeli bëri gabim të madh, do ndëshkohet!

Udhëheqësi Suprem i Iranit, Ajatollah Ali Khamenei paralajmëron sërish SHBA se do të përballet me pasoja nëse do të ndërhyjë ushtarakisht krah izraelit.
Çdo formë ndërhyrjeje ushtarake nga SHBA do të përballet pa dyshim me pasoja të pariparueshme,” thuhet në deklaratën e Khameneit e cila po lexohet nga prezantuesja e televizonit shtetëror në Teheran.

“Njerëzit e mençur që njohin Iranin, popullin dhe historinë e tij, kurrë nuk i drejtohen këtij kombi me gjuhën e kërcënimeve, sepse iranianët nuk janë ata që dorëzohen” thuhet më tej në deklaratë.
Ndërkohë në mesazhin drejtuar popullit iranian theksohet

“Izraeli ka bërë një gabim të madh dhe do të ndëshkohet. Nuk do ta harrojmë gjakun e dëshmorëve dhe sulmin Izraelit ndaj territorit tonë”
Dita e 6-te e luftes Izrael – Iran

Aeroplanët ushtarakë izraelitë goditën kryeqytetin iranian pak para agimit të sotëm, pasi ushtria lëshoi paralajmërime që civilët të largoheshin nga një qark i Teheranit.

Më pas, ushtria izraelite tha se ka goditur objekte për prodhimin e armëve dhe një qendër që përdoret për të prodhuar centrifuga në Teheran.

“Më shumë se 50 aeroplanë ushtarakë izraelitë kanë kryer një sërë sulmesh në zonën e Teheranit në orët e fundit. Si pjesë e përpjekjes më të gjerë për të ndërprerë programin e Teheranit për zhvillimin e armëve bërthamore, një ndërtesë për prodhimin e centrifugave në Teheran është shënjestruar”, u tha në deklaratë.

Ndërkaq, mëngjesin e 18 qershorit, Irani tha se ka sulmuar me raketa hipersonike Izraelin. Teherani u kërkoi banorëve të Tel Avivit që të përgatiten për një sulm, ndërsa Garda Revolucionare Islamike pretendoi se ka përdorur raketat hipersonike Fattah-1 për të sulmuar strehimore dhe një qendër tregtare.

Presidenti amerikan, Donald Trump, një ditë më parë kërkoi nga Republika Islamike që të “dorëzohet pa kushte”.
Ai gjithashtu tha se SHBA-ja me lehtësi mund të vrasë udhëheqësin suprem të Iranit.

“Ne e dimë saktësisht se ku po fshihet i ashtuquajturi ‘lider suprem’. Ai është një cak i lehtë, por është i sigurt aty ku është. Ne nuk do ta vrasim, të paktën tani për tani”, shkroi ai në platformën Truth Social.

Izraeli e nisi fushatën ajrore ndaj Iranit më 13 qershor, duke argumentuar se sulmet ndaj udhëheqësve ushtarakë, shkencëtarëve bërthamorë iranianë, qendrave për pasurim të uraniumit dhe programit të raketave balistike janë të domosdoshme për të parandaluar Iranin që të ketë armë bërthamore.

Irani pretendon se programi i tij bërthamor ka qëllime paqësore, duke thënë se nuk dëshiron të zhvillojë armë bërthamore. Si pasojë e sulmeve, në Iran janë vrarë të paktën 224 persona, ndërsa në Izrael është raportuar për 24 të vrarë.

/syri.net