Kërçovë: Shoqata e gjuetarëve “Eko Fazan” ankohet për diskriminim në koncesionet e gjuetisë

Shoqata e gjuetarëve Eko Fazan është e formuar që nga viti 2003, funksionon prej 23 vitesh dhe numëron mbi 250 anëtarë aktivë. Pas një sezoni të suksesshëm, shoqata ka njoftuar mbylljen e sezonit të gjuetisë. E njohur për angazhimin e saj në mbrojtjen e natyrës dhe mjedisit, ajo ka nisur një iniciativë të rëndësishme për studimin dhe monitorimin e faunës së egër në rajonin e Kërçovës.

Përmes përdorimit të kamerave-kurth, shoqata po evidenton speciet që jetojnë në këtë rajon, duke konstatuar edhe një rritje të ndjeshme të numrit të kafshëve të egra. Sipas të dhënave të mbledhura, në zonë është shtuar veçanërisht numri i kaprollëve, lepujve dhe arinjve, ndërsa është regjistruar edhe prania e rrëqebullit – një nga speciet më të rralla në Ballkan.

Megjithatë, në rajonin e Kërçovës, shoqata “Eko Fazan” shprehet e diskriminuar në ndarjen e koncesioneve të gjuetisë. Aktualisht, ajo ka në menaxhim vetëm zonën e gjuetisë së Bukojcanit, ndërsa zonat e Ujëmirit dhe Garana-Strellcës, prej nga gravitojnë shumica e gjuetarëve, janë dhënë me koncesion shoqatës “ELEN”, e cila posedon gjithsej pesë zona gjuetie.

Nëpërmjet një peticioni, të nënshkruar edhe nga 24 kryetarë të bashkësive lokale të ish-Komunës së Oslomesë, shoqata i është drejtuar autoriteteve përkatëse për korrigjimin e kësaj padrejtësie, duke theksuar se pikërisht ata dhe banorët lokalë kujdesen për këto zona.

Gjithashtu, “Eko Fazan” kërkon përkrahje edhe nga Komuna e Kërçovës përmes projekteve konkrete, duke qenë se shoqata ka punuar vazhdimisht për ruajtjen e kafshëve të egra në këtë rajon, sidomos gjatë dimrit, përmes ushqimit dhe kujdesit të vazhdueshëm, u shpreh kryetari i shoqatës, Kujtim Çodari.

/tvgurra