Kërçovë: Shërbimi i dobët bankar-potencial infektimi për klientët..

Shërbimi i dobët bankar përbën rrezik potencial infektimi për klientët të cilët edhe në këtë kohë me temperatura të ulëta, presin në radhë për të arritur deri te sporteli i bankës dhe për të marrë shërbimin përkatës.

Pritjet e gjata përpara objekteve të bankave në Kërçovë i kanë revoltual tejmase qytetarët e Kërçovës të cilët rrezikojnë edhe shëndetin e tyre për shkak të shërbimit të dobët që ofrohet sidomos kohëve të fundit nga thuajse të gjitha bankat që veprojnë këtu.

Pamjet filmike të kamerës tonë e dëshmojnë dëshprimin e madh të qytetarëve për situatën katastrofale që e krijojnë shërbimet bankare, duke i torturuar klientët me pritjet e stërgjatura përpara hyrjeve në bankat Kërçovës.

Kjo torturë e klientëve është e përditshme, ndërkohë që drejtuesit e bankave dhe punonjësit e tyre nuk mërziten fare për shërbimet e tyre skandaloze që rrezikojnë tejmase shëndetin e njerëzve.

Në vend që të punësojnë kuadro në sportele dhe të rrisin kapacitetin e shërbimeve, në bankat e këtushme janë punësuar njerëz të sigurimit që kujdesen për kolonat e gjata të njerëzve që presin gjatë gjithë ditës për të marrë shërbimin e dëshiruar. Kjo neglizhencë e shërbimeve bankare është bërë e neveritshme.

Prandaj masat për tejkalimin e kësaj situate janë të domosdoshme. Dhe për këtë duhet të intervenojë edhe shteti, sepse këto grumbuj njerëzish, rrezikojnë shëndetin e tyre, dhe mund të jenë një rrezik potencial për zgjërimin e virusit korona në hapësirat tona.

/pollogu.mk