Kërçovë: Rruga para komunës 2 vjet e lënë në gropa..! (VIDEO)
Po bëhen gati dy vjet që kur kanë filluar punimet në rrugën “Boris Kidriç “në Kërçovë.
Kjo zvarritje është bërë për shkak të disa pengesave dhe dokumenteve.
E pasojat e këtyre zvarritjeve më së shumti po i ndjejnë qytetarët të cilët frekuentojnë çdo ditë atë rrugë e cila është shumë e frekuentuar. Gjendja më e vështirë është sidomos gjatë vjeshtës dhe dimrit.
Pas një pauze të gjatë, punimet kanë filluar këtyre ditëve dhe siç mund të shihet po vendosen anësoret dhe po rregullohen trotuaret.
“U bënë gati dy vite që kur rruga Boris Kidriç po qëndron në gjendjen e njëjte, kjo rrugë është shumë e frekuentuar nga kërçovarët, por ajo u gërrye dhe u la si e tillë për një kohë të gjatë. Si duket tani kanë finuar disa punime në vendosjen e anësoreve, por po punohet me intensitet të ulët”,raporton Salije Sadiku, gazetare TV21.
Rruga u gërrye dhe u la si e tillë, sepse fillimisht hasi në pengesë me objektet e përkohshme që komuna i rrënoi kur filluan punimet. Më pas Banka Botërore e cila financon projektin, pas ankesës së pronarëve të objekteve, kërkoi që komuna të njëjtët t’i dëmshpërblejë.
Problemi tjetër më pas ishte kompania kontraktuese e cila pas rritjes së çmimeve, ndryshoi mendje dhe mjetet i dukeshin të pa mjaftueshme.
Kryetari I Komunës së Kërçovës Fatmir Dehari duke ju kërkuar ndjesë qytetarëve tha se në fund të muajit nëntor rruga do të jetë e përfunduar.
“Ne në këtë rast si institucion komunë në një mënyrë ishim viktimë e gjithë kësaj ngjarje meqë jemi shfrytëzues të këtij projekti nga Banka Botërore, por megjithatë tani, u tejkaluan të gjitha dhe mund të regjistroni që punimet kanë filluar dhe sipas dinamikës së paraparë deri në javën e fundit të nëntorit ky objekt rrugorë duhet të përfundojë”, pohoi Fatmir Dehari, kryetarë i komunës së Kërçovës.
Në qershor të viti të kaluar kryetari Dehari në facebook njoftoi fillimin e punimeve dhe e cilësoi si një projekt madhor sepse në të është e paraparë të vendoset edhe kanalizimi, shteg për biçikleta, rreth rrotullime si dhe gjelbërim.
VIDEO:
/tv21
