Kërçovë: NP “Komunalec” vazhdon të hedhë mbeturina në Osllome..(VIDEO)

Në adresë të TV21 kanë arritur pamje nga banorët ku shihet se si Ndërmarrja Komunale e Kërçovës sërish gjatë ditës së sotme ka hedhur mbeturina në hapësirat e xeherores së Osllomesë, e më pas të njëjtat mbulohen me dhe.

Për këtë shqetësim të banorëve TV21 raportoi javë më parë dhe për një kohë nuk u hodhën mbeturina, por sot banorët kanë arritur të xhirojnë siç thonë ata 10 kamionë me mbeturina dhe më pas me ekskavatorë i kanë mbuluar.

Ata thonë se kërkesat e tyre drejtuar Fatmir Deharit nuk përfillen dhe akuzojnë Deharin se ka shkelur marrëveshjen e nënshkruat më 15 shkurt të vitit 2020, me të cilën nuk do të dërgohen mbeturinat afër fshatrave të Osllomesë. Banorët paralajmërojnë protesta.

Ndërkaq, kryetari i Kërçovës Fatmir Dehari në një deklaratë të mëhershme për TV21 tha se në qytet mbeturinat janë problem 40-vjeçar dhe revoltën e banorëve e cilësoi si politike.

“I menaxhojmë për një kohë të caktuar deri në fillimin e funksionimit të deponive rajonale. Në këtë rast fatkeqësisht një pjesë e bashkësive lokale, konkretisht e kam vërejtur në fshatin Garanë më shumë i ngjajnë një strukture politike se sa të zgjedhur për t’u marrë me zgjidhjen e problemeve lokale, theksoi Fatmir Dehari, kryetar i komunës së Kërçovës.

VIDEO:

/tv21