Kërçovë: Ndihma konkrete për të prekurit nga përmbytjet

Situata me vërshimet e lumit të Zajazit që shkaktuan dëme të mëdha në lagjen e “Prilepit” në Kërçovë vazhdon të jetë e rënduar. Është intervenuar në shtratin e lumit dhe në shtëpitë e dëmtuara, ndërkohë që banorëve të rrezikuar nga përmbytjet, u janë ofruar ndihmat e nevojshme ushqimore dhe higjienike, por edhe përkujdesja mjekësore dhe masat preventive për parandalimin e infeksioneve të mundshme.

“Gjendja në objektet e përmbytura nga vërshimet e lumit të Zajazit është e mjerueshme. Për shkak të dëmeve në shtëpitë e tyre të mbushura me ujë, rreth 100 persona nga lagja e “Prilepit” janë vendosur në sallën sportive të Ivanidollit, ku janë siguruar dyshekë, batanije, pije, ushqime dhe përkujdesje mjekësore.”, thotë Besnik Selimi, sekretar i Kryqit të Kuq në Kërçovë, i cili shton se ekipet e posaçme të intervenimit kanë marrë masa konkrete në shtratin e lumit dhe në objektet e banimit, por situata vazhdon të jetë alarmante.

“Jemi në një gjendje të mjerueshme, shtëpitë janë të mbushura me ujë, është dëmtuar inventari, prandaj vendosja e sërishme në ato objekte është e pamundur.”, thonë banorët e prekur nga përmbytjet, të cilët shprehin fjalë miradie për Organizatën e Kryqit të Kuq dhe të gjithë ata që kanë ofruar mbështetje në këto momente të vështira të jetës.

Ata kërkojnë nga komuna e Kërçovës dhe institucionet e shtetit zgjidhje konkrete dhe ndihma materiale për tejkalimin e kësaj situate që u krijua nga vërshimet e lumit të Zajazit në lagjen e Prilepit në qytetin e Kërçovës.

/mrt2