Kërçovë: Kundërshtojnë bazën e asfaltit në mes të lagjes..! (VIDEO)

Kjo bazë asfalti është ndërtuar në lagjen Ivanidoll të Kërçovës.
Është vetëm 60 metra larg shtëpive, ndërsa ligjërisht një bazë asfalti duhet të jetë 5km larg një vendbanimi.

Prej 23 muajve banorët e lagjes, që janë rreth 1600, po luftojnë nëpërmjet institucioneve që baza të mos fillojë me punë dhe të dislokohet.

“Erdhi inspektori dhe panë vendin ku ndërtohet dhe vendosën që kjo bazë e asfaltit nuk mund të punojë nëse nuk e merr lejen e integruar A, kjo leje jepet në fund dhe i kërkojmë ministrit të Ekologjisë në bashkëpunim me drejtorin e drejtorisë Igor Nikoskit dhe drejtoreshës së Inspektoratit të Mjedisit Jetësor Ivana që të marrin një hap që të ndalohet dhënia e lejes së integruar A”, tha një banor.

“Ne nga Ministria për Ambient Jetësor kërkojmë që të dislokohet baza e asfaltit sepse është shumë afër lagjes edhe atë nga lagjja e re është 30 metra ndërsa deri tek lagjja tjetër është 200 deri 300 metra larg dhe sipas ligjit duhet të jetë 5 km. Presim nga institucionet përkatëse ta dislokojnë dhe të mos jetë këtu sepse të gjithëve ju pengon, të gjithë banorëve këtu”, tha një tjetër banor.

Banorët iniciativën kundër kësaj baze e kanë nisur që kur ka filluar të ndërtohet në vitin 2023. Kanë dorëzuar dokumente në çdo institucion përkatës.

Pas luftës disamujore të banorëve ditë më parë më në fund këtë lagje e vizituan Inspektorati Shtetëror i Mjedisit të cilët potencuan se para se të jepet leje e integruar A do të ketë debat publik.

Se si institucionet do të veprojnë më tej, mbetet të pritet. Banorët thonë se nëse nuk merren masat e duhura nga kompetentët, do të dalin në protesta dhe betejën do ta vazhdojnë në rrugë ligjore përmes gjykatës.

VIDEO:

/tv21