Kërçovë Kryqi i Kuq u del në ndihmë qytetarëve

Përmbytjet që kanë goditur sërish rajonin e Kërçovës kanë shkaktuar dëme serioze dhe shqetësim te popullata. Si pasojë e reshjeve të dendura dhe daljes së lumenjve nga shtrati, një numër i madh familjesh po përballen me shtëpi të përmbytura dhe vështirësi në lëvizje.

Kryqi i Kuq i Republikës së Maqedonisë së Veriut – Organizata Komunale Kërçovë është sërish në terren dhe po vepron në mënyrë aktive në koordinim me institucionet përkatëse. Ekipet e vullnetarëve dhe të punonjësve u angazhuan menjëherë për të mbështetur popullatën e prekur.

Deri më tani janë evakuuar rreth 230 persona, të cilët janë vendosur përkohësisht në sallën sportive “Hristo Uzunov”. Aktualisht po sigurohen dyshekë, shtretër, batanije, ushqim dhe vakte të ngrohta, ujë për pije si dhe mjete për mirëmbajtjen e higjienës personale dhe kolektive.

Kryqi i Kuq mbetet i përkushtuar në sigurimin e ndihmës humanitare dhe mbështetjes psikosociale për të gjitha familjet e prekura, duke bërë thirrje për solidaritet dhe mbështetje nga komuniteti në këto momente të vështira.

/ms