Kërçovari Gëzim Rushiti në gjurmët e prindërve të tij. Shkruan Shaban Dalipi

Manifestimi promovues kushtuar atdhetarit Ajet Rushiti, i mbajtur më 10 qershor, në Pallatin e Kulturës në Kërçovë, zgjoi një interesim të madh tek publiku i pranishëm në sallë dhe ata të cilët e ndoqën përmes mediave lokale, regjionale dhe rrjeteve sociale. Ishte një manifestim shumë tërheqës për publikun e gjërë, sepse ai fokusonte dy projekte interesante që prezentojnë veprimtarinë e mërgatës shqiptare në SHBA, aktivitetet e Ballit Kombëtar dhe Lidhjes Kosovare për çështjen shqiptare në ish Jugosllavi, dhe atë të Kosovës në veçanti.

Fillimisht, vëmendja e publikut u përqëndrua në okumentarin filmik, i cili prezentoi dokumente arkivore, fakte dhe argumente të mbështetura edhe në deklarata të veprimtarëve të asaj periudhe kohore për kauzën tonë kombëtare, përfëshirë këtu edhe veprimtarinë sensibilizuese për zbardhjen e të vërtetës për Kosovën, pjesë e së cilës ka qenë edhe atdhetari Ajet Rushiti dhe bashkëpunëtorët e tij që ishin pjesë e Ballit Kombëtar dhe Lidhjes Kosovare.

Por, shtylla kryesore e këtij manifestimi ishte libri monografik “Ajet Rushiti në sfidat e rrugëtimit atdhetar”, për të cilët folën panelistët dhe figura të rëndësishme të jetës publike dhe shoqërore nga hapësirat shqiptare. Pas këtyre vlerësimeve, në skenë doli djali i Ajet Rushitit, Gëzim Rushiti, i cili u shprehu mirënjohje të gjithë atyre që kontribuan për konkretizimin e këtij projekti që ngërthen veprimtarinë dinjitoze të mërgatës tonë, e cila ka qenë pjesë e të gjitha proceseve shoqërore dhe politike në hapësirat shqiptare, përfëshirë këtu edhe aktivitetin e ngjeshur të Ballit Kombëtar dhe Lidhjes Kosovare.

Duke marrë si shkas fjalimin e tij në këtë manifestim promovues, në pika të shkurtëra do t’ju prezentojmë biografinë e Gëzim Rushitit, djalit të veprimtarit Ajet Rushiti. Ai lindi në vitin 1969 në Chikago, shkollimin fillor dhe të mesëm i kreu në East Coloma Elementary School-Rock Falls, Illinois dhe Hononegah High Shcool-Rockton, Illinois , ndërsa studimet universitare në RockValley College në Rockford,Illinois.

U rrit në një ambient familjar me tradita atdhetare, humanitare dhe arsimore që i shërbyen atij si frymëzim në sfidat e jetës. Aktualisht jeton në Dallas dhe njihet si afarist i suksesshëm shqiptar në Texsas.

Gëzim Rushiti është njëri nga themeluesit e “Albanians for America” më vitin 2024 dhe aktualisht është në pozicionin e nënkryetarit të këtij forumi, i cili përmes mbështetjes së zyrtarëve të lartë të administtratës amerikane, angazhohet për tejkalimin e situatave politike në ballkan dhe mirëqenien e shqiptarëve në Kosovë, Shqipëri, Maqedinë e Veriut dhe luginën e Preshevës.
Familjarët, shokët dhe miqtë e tij, vlerësojnë se Gëzim Rushiti po ndjek gjurmët e prindërve të tij, duke ruajtur dhe promovuar vlerat atdhetare e kombëtare që ata kultivuan ndër vite.

Angazhimi i tij për dokumentimin dhe përcjelljen e kësaj historie te brezat e rinj, dëshmon vazhdimësinë e një tradite familjare të përkushtimit ndaj kauzës kombëtare, duke e bërë atë një vazhdues të denjë të misionit të nisur nga babai i tij, Ajet Rushiti.

/tvgurra