Kërçovarët Nuredin Dervishi dhe Blerina Zendeli përfaqësues të RMV në Kampionatin Evropian të Karatesë

Karatistët kërçovarë Nuredin Dervishi dhe Blerina Zendeli do të përfaqësojnë Republikën e Maqedonisë së Veriut në Kampionatin Evropian të Karatesë, i cili do të mbahet nga 6 deri më 8 shkurt 2026 në Limassol të Qipros, për kategoritë kadetë, juniorë dhe U-21.
Në këtë kampionat madhor do të marrin pjesë mbi 1.200 garues nga 47 shtete evropiane, duke e bërë një nga ngjarjet më të rëndësishme të karatesë në nivel kontinental.

Nuredin Dervishi do të garojë në kategorinë juniorë, ndërsa Blerina Zendeli në kategorinë kadetë, të dy në disiplinën kata.
Garuesit në disiplinën kata do të udhëhiqen nga prof. Nexhbi Dervishi, trajner i klubit të karatesë “Uskana” nga Kërçova, një profesionist i përkushtuar, i disiplinuar dhe ambicioz, me kontribut të vazhdueshëm në zhvillimin e sportit të karatesë.

Dy sportistët nuk përfaqësojnë vetëm shtetin, por edhe qytetin e Kërçovës. Vlen të theksohet se Shoqata “Vatra” i ka shpallur ata Sportistë të Vitit 2025, ndërsa ka vlerësuar edhe trajnerin e tyre për sukseset e arritura.
Kampionëve tanë dhe trajnerit të tyre u urojmë përfaqësim dinjitoz, shumë fat dhe sukses në këtë event të rëndësishëm evropian.

/votra.info