Kërçova qyteti i vetëm në planet që nuk e do sportin ?

Ky status është shkruar nga sportdashësi Masaro, pa asnjë interes personal dhe pa asnjë ngjyrim politik, i udhëhequr vetëm nga dashuria për sportin dhe për Kërçovën.

“Imagjinoni çfarë kemi nga sporti. Dy klube futbolli që garojnë në Ligën e Tretë dhe edhe kjo quhet sukses, sepse nuk kemi as Ligë të Katërt komunale. Nga ana tjetër, kemi volejbollin e femrave, KV Uskana, që garon në Ligën e Parë Shtetërore – një nivel që shumë qytete më të mëdha në Maqedoninë e Veriut vetëm e ëndërrojnë, ndërsa ne nuk dimë ta ruajmë dhe ta mbështesim.

Kampionati shtetëror e nisi sezonin pranveror fundjavën që kaloi pa asnjë stërvitje, sepse nuk ka sallë funksionale. Nga dy salla sportive, asnjëra nuk funksionon. Njëra thuhet se është renovuar prej vitesh, por nuk është lëshuar zyrtarisht dhe vazhdon të ketë probleme serioze infrastrukturore.

Sa kohë duhet që këto dy salla të vihen në funksion? Asgjë më shumë se një ditë pune. Ndërkohë, vajzat mbesin pa stërvitje dhe pa kushte, edhe pse përfaqësojnë Kërçovën në nivel shtetëror. Pyetja është e thjeshtë: ku do të luajnë ndeshjet e radhës?

Të gjithë flasim që të rinjtë të merren me sport dhe të mos bien pre e alkoolit dhe drogës, por në praktikë po bëjmë të kundërtën. Në këtë qytet është bërë mëkat të investosh në sport.
Ky është një apel i sinqertë për ndërgjegjësim.

Komuna e Kërçovës duhet të dëgjojë dhe të veprojë shpejt, seriozisht dhe nga rrënjët, sepse sporti po largohet nga Kërçova, ashtu siç janë larguar shumë gjëra të tjera më parë.”
Napredok – Vellazrimi — Uskana

/tvgurra