“Kërçova Qytet i Kulturës 2026” favorizon individët, shoqatat shqiptare ndihen të anashkaluara ?

Reagimet ndaj ndarjes së mjeteve në kuadër të programit “Kërçova Qytet i Kulturës 2026” po vazhdojnë, ndërsa përfaqësues të shoqatave kulturore shqiptare shprehin pakënaqësi për mënyrën e financimit dhe përzgjedhjes së projekteve atyre tradicionale me me shumë se 5 vjet.

Shoqata Kulturore-Artistike “ArTact-Us”, organizatore e Festivalit të Teatrit “Uskana Fest”, ka reaguar publikisht duke theksuar se kjo shoqatë prej vitesh realizon projekte artistike me ndikim të rëndësishëm në jetën kulturore të qytetit.

“Uskana Fest” është një nga ngjarjet më të rëndësishme kulturore në Kërçovë, i cili vitin e kaluar shënoi jubileun e pestë, ndërsa këtë vit ka aplikuar për organizimin e edicionit të gjashtë.

Pakënaqësi janë shprehur edhe për mosvlerësimin e aktiviteteve tradicionale dhe kulturore si “Mbrëmjet Poetike” nga Klubi i Shkrimtarëve Penestia, për manifestimin “Hynesha Thana”, ku ndër vite janë mbledhur poetë nga mbarë trevat shqiptare.

Gjithashtu, përmenden edhe manifestimi “Dasma Tradicionale Kërçovare”, ku kultivohen dhe promovohen doket e zakonet shqiptare,
si dhe ndarja e çmimeve “VOTRA”, të cilat konsiderohen si kurora e manifestimeve lokale, pasi vlerësojnë arritjet në kulturë, sport dhe shkencë.

Përfaqësuesit e këtyre aktiviteteve vlerësojnë se ndarja e fondeve këtë vit nuk ka reflektuar në mënyrë të balancuar kontributin shumëvjeçar të shoqatave shqiptare.

Sipas tyre, buxheti i ndarë ka krijuar perceptimin e pabarazisë dhe të favorizimit të personave fizikë në raport me organizatat që ndër vite kanë ndërtuar dhe mbajtur gjallë jetën kulturore të qytetit.
Debati për transparencën, kriteret e përzgjedhjes dhe shpërndarjen e fondeve pritet të vazhdojë edhe në ditët në vijim.

/tvgurra