Kërçova, “Qytet i Kulturës 2026”

Qyteti i Kulturës 2026 është Komuna e Kërçovës. Ky është vendimi që mori komisioni i Ministrisë së Kulturës në konkursin e shpallur në muajin dhjetor vitit të kaluar, ku aplikuan vetëm katër qytete, Tetova, Manastiri, Makedonska Kamenica. Programi i pasur me koncept të qëndrueshëm, përmbajtje me zhanre të ndryshme, nga krijimtaria tradicionale dhe bashkëkohore, me pjesëmarrjen e artistëve vendas dhe të huaj janë arsyet që Komisioni vendosi që stafetën e manifestimit ta dorëzojë në Kërçovë, shkruan gazeta KOHA.

Manifestimi që do të zgjasë deri në fund të këtij viti ka filluar zyrtarisht të mërkurën, i cilësuar nga organizatorët si kapitull i ri në zhvillimin kulturor të qytetit, përmban mbi 150 ngjarje, koncerte, shfaqje dhe ekspozita të artit figurativ, që do të kushtojnë rreth dhjetë milionë denarë, nga të cilat katër milionë janë akorduar nga MKT, ndërsa pjesa tjetër nga buxheti i komunës.

“Kërçova do të rritet në një skenë kulturore gjatë gjithë vitit, e cila do të shpalosë me dinjitet trashëgiminë e pasur kulturore dhe historike, traditën multikulturore dhe energjinë e gjallë krijuese bashkëkohore. Qyteti do ta hapë shpirtin e tij përmes një programi të larmishëm”, u shpreh ministri Zoran Lutkov, i pranishëm në ceremoninë e hapjes.

“Qyteti i kulturës”, është konceptuar që të sigurojë kushtet për një zhvillim të barabartë kulturor, akses dhe shfrytëzim masiv të vlerave kulturore për të gjithë qytetarët, për të nxitur jetën kulturore në nivel lokal. Po ashtu synohet demetropolizimi i kulturës dhe zhvillimin e jetës kulturore në periferi, në qyteza dhe komuna ku manifestimet kulturore janë më të rralla. Kjo është arsyeja që në konkursin “Qytet i Kulturës” nuk marrin pjesë komunat rurale dhe Qyteti i Shkupit, si edhe komunat që bëjnë pjesë në të. Pjesëmarrja e komunave shqiptare në konkurrim në vite ka qenë i vogël, ndërsa asnjëherë, që nga viti 2004 kur ka nisur të zhvillohet stafeta nuk ka përfunduar në asnjë komunë shqiptare.

Një pjesë e komunave kanë arsyetuar mospjesëmarrje me vonesat në hartimin e programit të detajuar, fondin e vogël që akordohet nga Ministria e Kulturës, apo edhe në refuzimet që i janë bërë kur kanë konkurruar. Me përjashtim të Kërçovës, që u shpall fituese në vitin 2020, por asnjë aktivitet nuk u realizua për shkak të kufizimeve të pandemisë. Teatova apo Struga kanë konkurruar rrallë dhe nuk kanë fituar.

Këtë vit, Komuna e Tetovës ka pasur mangësi në dokumentacionin e paraqitur, duke e përjashtuar nga mundësia për të fituar, ashtu si edhe dy konkurrentët e tjerë. Nga ana tjetër ka nga ato komuna maqedonase të cilat shpallen edhe për herë të dytë, apo të tretë. Të rregullt në konkurrim janë Radovishi, Manastiri, Prilepi, Kumanova, Shtipi, Gjevgjelia, Koçani, Kriva Pallanka, Krusheva. Ndërsa qyteti që e mbajti deri tani këtë titull ishte Gjevgjelia.

Ministria e Kulturës i shpall fituesit në bazë të Programit që dorëzohet nga çdo qytet, i cili po ashtu përveç plotësimit të kritereve dhe kushteve duhet të jetë i precizuar për të gjitha ngjarjet kulturore nga sferat e artit skenik, dramatik, figurativ, muzikës e të tjera që do të zhvillohen gjatë vitit, kostot e tyre, vendndodhjen, e të tjera.

/(koha.mk)