Kërçova nuk ka nevojë për dy Fatmirë që i kanë shërbyer partive, por për një të sinqertë që i shërben popullit!
Njëri ka ndërruar ngjyrat më shumë se flamuri në erë, tjetri ka ndenjur heshtur teksa Kërçova zbrazej. Njëri i bindur në emra, tjetri i shitur në pazare. Dhe sot të dy duan të udhëheqin qytetin që e lanë në harresë.
Populli i Kërçovës nuk është më naiv. Nuk mashtrohet me buzëqeshje false e premtime boshe. Mjaft më me kandidat kukulla që zgjohen vetëm kur ka zgjedhje. Është koha të flasë Kërçova, jo të flasin Fatmirët për Kërçovën!
Fatmiri i parë? Një relikt i vjetër politik që ka ndërruar logot e partive si çorapet, gjithnjë në kërkim të kolltukut, jo të drejtës. Asnjëherë s’e kemi dëgjuar të flasë kur Kërçova dhunohej ekonomikisht, kur të rinjtë iknin, kur shqiptarët diskriminoheshin. Heshti sepse heshtja i garantonte privilegjin.
Fatmiri i dytë? Mjeshtër i marketingut politik dhe i premtimeve të pambajtura. Nën hijen e emrave të mëdhenj fshihet një karrierist që e sheh pushtetin si trampolinë për pazare të reja, jo si shërbim ndaj qytetarëve. Ka qenë në çdo qeveri, por Kërçova s’ka parë asgjë. Rastësi? Jo. Strategji për të mbetur i preferuari i shefave.
Tani të dy dalin para popullit me fytyra të lara e me fjalë të bukura, siç bëjnë gjithmonë kur afrohen zgjedhjet. Të dy duan të shesin të njëjtën gënjeshtër me paketim të ndryshëm. Por një gjë harrojnë: populli i Kërçovës është zgjuar!
Nuk jemi më në vitin 2005. Nuk mashtrohemi me fjalë të mëdha, as me flamuj e premtime që djegin si fishekzjarre e shuhen si qirinj. Kërçova ka nevojë për një njeri të ndershëm, të guximshëm, që nuk e ka emrin në dosjet e turpit politik dhe që nuk sillet si “shërbëtor partie”, por si shërbëtor i qytetarëve!
Nuk do të lejojmë që Kërçova të bëhet pronë private e dy “Fatmirëve”, që fatin e popullit e shohin si karrierë personale. Ky qytet meriton më shumë. Meriton drejtësi, zhvillim, barazi dhe dinjitet!
Zgjohu Kërçovë — jo për njërin Fatmir apo për tjetrin, por për veten tënde! Shkruan gazetari Nevrij Ademi në facebook.
/ms
