Kërçova në garën midis shqiptarëve dhe maqedonëve..!?

Tani është e qartë se thirrja për një kandidat të vetëm shqiptar në Kërçovë është e kotë dhe e pakuptimtë. Deri më tani, gara në zgjedhjet lokale të vjeshtës ka tre kandidatë shqiptarë, njëri i konfirmuar e dy të tjerët të përfolur. I riu shqiptar, Shkodran Alili, si kandidat i pavarur, nuk do të jetë i vetmi nga kampi shqiptar. Drejtimi shqiptar i kësaj komune është në fije të perit pasi VMRO-DPMNE së shpejti do ta nxjerrë kandidatin e saj. Bashkimi potencial i dy partive maqedonase do të sillte humbjen e Kërçovës për shqiptarët.

Në mesin e muajit tetor të këtij viti do të mbahen zgjedhjet lokale të radhës për 80 komuna në Maqedoninë e Veriut.
Megjithëse janë edhe gjashtë muaj deri në garën zgjedhore, partitë kryesore, përfshirë kryetarë aktualë, por edhe aso të pavarur, kanë filluar lëvizjet përgatitore.

Zgjedhjet për qeverisjet lokale do të jenë test për të gjitha partitë në kampin shqiptar dhe atë maqedonas, sidomos pas barrikadimeve në koalicione rivale.

Një nga garat më të ashpra, ku zgjedhjet do të përshkallëzohen edhe në garë mes etnive, është edhe ajo për atë se kush do ta drejtojë komunën e Kërçovës për katër vitet e ardhshme.

Alili, i riu shqiptar që matet si i pavarur
I pari që i ka hyrë garës si kandidat i pavarur është avokati 32-vjeçar, Shkodran Alili.

Në paraqitjen e paradoditshme për një nga mediet në Shkup, ai ka kërkuar mbështetjen nga BDI dhe koalicioni VLEN.
“Është e domosdoshme mbështetja nga dy taboret politike në qytetin e Kërçovës”, ka thënë Alili.

Ndonëse nuk është shpallur publikisht, edhe kryetari aktual i Kërçovës, Fatmir Dehari e ka lënë të nënkuptuar prej muajsh se do të kandidojë për mandatin e katërt me radhë në krye të komunës së Kërçovës.
Jozyrtarisht është përfolur që BDI mund t’i hyjë garës zgjedhore me kandidaturën e ish-ministrit të Ekonomisë, Kreshnik Bekteshi.

Po kandidati i përbashkët?
Në anën tjetër, koalicioni VLEN as nuk e ka mohuar dhe as pohuar kandidimin e Fatmir Limanit.
Brenda këtij koalicioni, që para pak kohësh paralajmëroi shkrirjen në një subjekt të vetëm, ende nuk ka një qëndrim përfundimtar.

Në një bashkëbisedim për një medium lokal nga Kërçova, kryetari i partisë ‘Alternativa’, Zeqirija Ibrahimi ka thënë se për ta është e rëndësishme që Kërçovën ta fitojë një kandidat shqiptar.
“Ne nuk kemi dashur që të eksperimentojmë e rrezikojmë me nxjerrjen e një emri si kandidat. Edhe BDI-ja është mirë ta kuptojë se nuk duhet të partizohet emri i kandidatit”, ka thënë Ibrahimi.

Ai ka kërkuar që partitë politike të bien në ujdi që ta përkrahin një kandidat shqiptar i cili e fiton këtë komunë.
“Është e vështirë gara aty për shkak të shpërnguljeve dhe pa votën e mërgatës shqiptare nuk fitohen zgjedhjet në këtë komunë”, ka thënë Ibrahimi.

Kthesa që filloi me 2013
Komuna në zemër të Maqedonisë Perëndimore udhëhiqet që prej vitit 2013 prej shqiptarëve, gjë që ishte mundësuar falë ligjit për ndarje territoriale ku Kërçovës i ishin bashkuar komunat rurale të Zajazit, Osllomesë, Drugovës dhe Vraneshticës.

Pas ribashkimit të Kërçovës në kufijtë e vet administrativë, kandidati i BDI-së, Fatmir Dehari është zgjedhur për tre mandate radhazi si kryetar i komunës.
Në dy palë zgjedhjet e kaluara, dy partitë maqedonase, VMRO-DPMNE dhe LSDM, ishin bashkuar mes vete duke u rreshtuar pas një kandidati të përbashkët.

Bashkimi i partive maqedone në Kërçovë e pati sfiduar seriozisht Deharin dhe BDI-në në zgjedhjet e tetorit të vitit 2021.
Kështu, në rrethin e parë të zgjedhjeve kandidati i VMRO-së, Aleksandër Jovanovski pati marrë 8801 vota, kurse Fatmir Dehari 8545 vota.

Vetëm me pjesëmarrjen e votuesve nga diaspora, kandidati i BDI-së ia doli mbanë garës zgjedhore duke i marrë 12,935 vota, ose 2017 vota më shumë sesa rivali i tij maqedonas.

Beteja për Kërçovën mes demografisë dhe zgjedhjeve
Një skenar i tillë ka mjaft të ngjarë që të përsëritet edhe sivjet.
Jo pak e diskutuar në media e ndër komentues politikë është çështja e demografisë.

Më 2013, pasi ribashkimit me komunat rurale të Zajazit dhe Osllomesë, përqindja e shqiptarëve në Kërçovë ishte ajo e një shumice relative prej 54.51 për qind.
Mirëpo, realitetet e reja dhe migrimi i vazhdueshëm i shqiptarëve ka prodhuar një tablo krejt të re për strukturën etnike në këtë komunë.

Së paku, nga regjistrimi i vitit 2021, numri rezident i shqiptarëve është 16,373 ose 41.26 përqind, duke shënuar një përgjysmim për njëzet vjet.
Në anën tjetër, numri i maqedonasve nuk ka pësuar rënie të konsiderueshme në përqindje, meqë sipas statistikave të 2021-s si maqedonas janë deklaruar 16,020 vetë ose 40.38 përqind.

Prej vitit të kaluar kur VMRO-DPMNE u rikthye në pushtet, kurse BDI kaloi në opozitë, ka pasur plot incidente e përplasje ndëretnike.
I tillë kishte qenë edhe skandali në shtator të vitit të kaluar ku ishte fshirë gjuha shqipe në të gjitha tabelat dygjuhëshe në autostradën që lidh Kërçovën me Ohrin.

/NACIONALE/