Kërçova flet edhe shqip – baneri vetëm në maqedonish !
Këshilltarja Syarta Saliju Osmani: “Kërçova flet edhe shqip – baneri vetëm në maqedonisht është i papranueshëm”
Këshilltarja komunale në Komunën e Kërçovës, Syarta Saliju Osmani, ka reaguar ndaj vendosjes së banerit promovues për “Kërçova Film”, i cili, sipas saj, është vendosur vetëm në gjuhën maqedonase.
Ajo thekson se nuk reagoi menjëherë, duke pritur që Komuna ta korrigjonte këtë lëshim pas reagimeve publike, por një gjë e tillë nuk ndodhi. Sipas saj, bëhet fjalë për shkelje të nenit 11 të Statutit të Komunës së Kërçovës, i cili rregullon përdorimin e gjuhëve zyrtare.
Në reagimin e saj, Saliju Osmani ngre shqetësimin se, në prag të ardhjes së mërgimtarëve, një baner pa gjuhën shqipe krijon ndjenjë përjashtimi dhe mungese respekti ndaj qytetarëve shqiptarë. Ajo thekson se mërgimtarët kanë kontribuar për dekada në zhvillimin e Kërçovës dhe se respektimi i gjuhës shqipe është detyrim ligjor dhe institucional.
Në fund, ajo i bën thirrje Komunës së Kërçovës ta korrigjojë menjëherë këtë veprim dhe të sigurojë që në të ardhmen të respektohen të drejtat gjuhësore të të gjithë qytetarëve, duke paralajmëruar se, nëse raste të tilla përsëriten, qytetarët do të mbrojnë me vendosmëri dinjitetin dhe të drejtat e tyre.
/tvgurra
