Kërçovë: Bizneset kundër, qytetarët pro projektligjit që ndalon duhanin në hapësira të mbyllura

Projekt-ligji i ri për mbrojtje nga duhani ka shqetësuar bizneset, veçanërisht restorantet, kafetë dhe bar-kafetë, shprehin pakënaqësi dhe revoltë!
Shumë pronarë lokalesh me të cilët folëm në Kërçovë, nuk duan të shprehen para kamerës, por prapa saj na thonë se ndalimi i duhanit mund të ulë frekuentimin dhe fitimet në lokalet e tyre, duke u shqetësuar për ndikimet ekonomike në një sektor tashmë të ndjeshëm.

Por për dallim nga bizneset, shumica e qytetarëve e mirëpresin këtë ndryshim, duke e parë si një fitore për shëndetin dhe cilësinë e jetës.
“Mendoj se jo si respektohet gjithkund të respektohet edhe tek ne”, u shpreh një qytetar.

“Të merren masat më rigoroze dhe duhani të ndalohet. Ligjin sa më shpejt qeveria ta sjellë dhe jo ta zgjas në interes të bizneseve private dhe lokaleve sepse këtu dëmtohen joduhanpirësit. Në lokal 50 persona 10 joduhanpirës 40 duhanpirës ata që nuk pinë duhan e thithin tymin e atyre që pinë”, tha një qytetar tjetër.
“Unë jam kundër duhanit dhe gjithkund duhet të ndalohet”, potencoi një tjetër qytetar.

“Edhe unë mendoj se duhet edhe atë sa më shpejt jo të pritet 1 marsi”, theksoi qytetari.
Ditë më parë, përmes një qëndrimi të përbashkët, pronarë të bizneseve të vogla, reaguan në lidhje me draft-ligjin për mbrojtjen nga duhani, duke shprehur shqetësime për pasojat që do të shkaktojë zgjidhja ligjore për këtë veprimtari tregtare. Paralajmërojnë se mbi 4.000 biznese të vogla, si tobako, kioska dhe mini-markete, rrezikojnë të mbyllen.

Nga ana tjetër Ministria e Shëndetësisë janë shprehur se projektligji parashikon masa për rritjen e ndërgjegjësimit publik dhe mbështetje për ndërprerjen e varësisë nga duhani, sepse varësia nga nikotina është një problem shëndetësor publik dhe se parandalimi është më efektiv dhe më pak i kushtueshëm se trajtimi.

VIDEO:

/tv21