Këngëtari Kërçovar Nazim Sulejmani – Ximi me mesazh prekës për vdekjen e Shpat Kasapit

Me zemër të lënduar, këngëtari kërçovar Nazim Sulejmani – XiMi, aktualisht Avokat i Shtetit, ndan një mesazh shumë emocionues për vëllain dhe kolegun e tij të dashur, Shpat Kasapin, i cili ndërroi jetë në moshë të re.

Dedikuar vëllaut tim…
Në këtë natë të vonë, nuk mund të besoj që po shkruaj për ikjen tënde… duket absurde.
Në vend që të shkruaja urata për planet dhe projektet muzikore që kishe, tani fjalët më vijnë të rënda nga dhimbja dhe humbja e madhe.
Ah Shpat, o vëlla i shpirtit…

Zoti e di pse të mori. Ndoshta e kreve misionin e Tij në këtë botë — të jesh shembull i një djali të mirë, shoku i rrallë, artisti me shpirt dhe familjari që i qëndronte pranë të gjithëve. Por për ne, ikja jote është një tronditje e madhe, një dhimbje që nuk shërohet lehtë.

Me kujtohet festivali Nota Fest 2003, ku morëm pjesë të dy. Ti hyre si uragan dhe pushtove zemrat e të gjithëve, por gjithmonë ke qenë me këmbë në tokë, i thjeshtë dhe i pastër.
Me thirre në studio për të dëgjuar instrumentalin e këngës “Unë di të fal”, të cilës i kishe kushtuar shumë mund. Kur e dëgjova, të thashë: “Shpat, shumë këngë e mirë… por këtë do ta këndoj unë.” Dhe ti, pa u menduar, më the: “Ok, vlla.” Ky ishte shpirt i madh, kjo ishte zemra jote.

Sot kam marrë shumë mesazhe dhe telefonata ngushëllimi nga miqtë tanë, e sidomos nga bashkëvendësit e mi kërçovarë — këtu dhe në diasporë. Të gjithë e dinin që Kërçova ishte shtëpia jote e dytë. Pritjet e Vitit të Ri gjithmonë i prisnim bashkë… dhe ti anuloje oferta të majme që të vinin nga çdo anë, vetëm që të këndonim në Kërçovë, mes njerëzve tanë.
“Du me qenë me ju dhe të festojmë me shoqërinë tonë,” më thoshe.

Sot po qajnë të gjithë, jo vetëm Kërçova… por kudo ku flitet shqip. Dhimbja e ikjes tënde ka prekur çdo zemër.
Zoti të pastë në parajsë.
I lutem Zotit t’u japë forcë familjes tënde, e sidomos nënës, për të përballuar këtë humbje kaq të madhe.
Pusho në paqe, o engjëll.
Do na mungosh pafund… 💔

/ms